KAK Sei Duni Tuir Funsionariu no Membru Governu Uza Kupon Mina Ba Transporte Privadu

DILI – Komisuan Anti Korupsaun oras nee servisu hamtuk ho kompania neebe mak oferese mina ba transporte estadu, atu prevene funsionariu no membru governu sira neebe mak uza kupon mina estadu nia ba intrese privadu.

Tuir Komisauriu Anti Korupsaun, Aderito Tilman, ba jornalista sira iha Largo Lecidere Kuarta (9/12) wainhira remata komemora loron mundial kombate korupsaun hatete iha kompania 3 hanesan Rubic, Aitula no Eto maka oferese mina ba transporte estadu.

Iha kompania 3 hanesan Rubic, Aitula no Eto mak ofrese mina ba transporte estadu nian tanba nee ita halo lansamentu servisu hamutuk atu fo hatene sira katak wainhira ema ruma uza kupon estadu nian labele ba ense fali mina ba transporte privadu karik ida nee mak akontese sira sei komonika mai KAK no ita halo kedan investigasaun hodi buka tuir,” dehan Aderito.

Nia hatutan durante nee akontese dala barak ona iha funsionariu nomos membru governu balu mak uza kupon estadu nian ba transporte privadu, no iha ona kazu balu mak hahu ona loke investigasaun.

Iha fatin hanesan Ajundu Komisariu Komisaun Anti Korupsaun, Jose Neves, mos hatete atu kombate korupsaun maka hotu-hotu tenke servisu hamutuk, maibe se KAK mesak maka KAK sei la halo buat ida.

Iha komemorsaun loron mundial Anti Korupsaun nian neebe halao iha Largo Lecidere hetan partisipsaun masimu hosi estudante hosi universidade UNITAL, UNPAZ, UNTL, nomos UNDIL inklui membru deputadu balu, komandante PNTL Julio Hornai nomos sosiadade sivil sira. Informasaun kompletu iha STL jornal no STL Web, edisaun Sesta (11/12/2015). Thomas Sanches

Suara Timor Lorosae