Estudante Soe Bebé iha Lágua Tasi-Tolu

Ema deskoñesidu soe bebé iha ai oan laran Lágua Tasi-Tolu, Suku Comoro, Munisípiu Díli iha Segunda (11/01/16) tuku  6:00 lokraik. Bebé oan ne’e falun iha pasta kor azúl laran ne’ebé maka falun tan ho plástiku mean ida.

Tuir informasaun ne’ebé maka jornalista Matadalan rekolla hosi Xefi Bairu Lágua, Alex Soares da Costa  katak bebé oan ne’e hetan hosi labarik sira ne’ebé maka halimar iha ai oan laran tiru manu. Deskonfia, bebé oan ne’e soe hosi feto na’in rua ne’ebé maka ho motór bebek  ida uza farda eskola nian maka lori bebé oan ne’e mai tara sa’e iha ai leten.

“Labarik sira ne’ebé maka tiru manu fuik la’o tun la’o sa’e iha ne’e maka hetan katak feto na’in rua maka lori bebé oan ne’e mai tara sa’e iha ai leten ne’e,” Alex dehan iha Tasi-tolu, Dili, (11/01/2016).

Komunidade sira ne’ebé maka  hela iha área ne’ebá hateten katak bebé oan ne’e maizumenus foin fulan haat iha isin maka  abortus de’it.

Observasaun jornalista Matadalan nota katak  komunidade iha área ne’ebá kuaze sai tomak hodi ba  asisti bebé ne’e. Bebé ne’e komunidade sira  intrega ona ba Polísia Investigasaun atu halo investigasaun  ba kazu ne’e. Polísia Investigasaun to’o kedas iha fatin akontesementu hodi lori  ba halo investigasaun iha tuku 20:00 kalan.

Celso Filipe Ximenes nu’udar juventude ida iha Bairu Lágua senti triste, tanba ema ne’ebé maka soe bebé ne’e laiha responsabilidade no hahalok hanesan animál. “Ita hatene halo de’it maibé lahatene responsabilidade ba ita nia hahalok,” Celso tenik.

 Nia dehan, hahalok ne’e krime tanba konsidera oho ema. Nia hatutan labarik mós iha direitu atu moris maibé tan de’it laiha responsabilidade hodi estraga fali labarik. (Arif)

Matadalan