Pelumenus ema na'in sia mate no na'in 200 kanek iha rai-nakdoko iha Índia

Nakdoko akontese iha loron-segunda madrugada iha rejiaun nordeste Índia nian, besik iha fronteira ho Myanmar no Bangladexe.

Pelumenus ema na'in sia mate no na'in 200 resin hetan kanek iha loron-segunda ne'e tanba rai-nakdoko ida ho magnitude 6,7 ne'ebé doko nordeste Índia nian. Vítima mortal na'in neen rejista aiha Índia no na'in tolu iha Bangladexe, haktuir hosi Reuters.

Rai-nakdoko iha klean ida 57 km, ho episentru lokalizadu iha 29 km hosi oeste Imphal, kapitál estadu indianu hosi Manipur.

Nakdoko akontese iha loron-segunda madrugada, iha tempu ne'ebé populasaun barak sei toba. Ema barak halai hosi sira nia uma no edifísiu oioin hetan evakuasaun. Maibé, hala'o operasaun sira hodi buka ema sobrevivente sira ka vítima balun.

Ministru Interiór indianu Rajnath Sign garanti ona katak apoiu sira sei fó nafatin ba Manipur, aumenta mós ajuda ba estadu sira seluk ne'ebé afetadu.

"Ha'u tenta kontakta ministru sira hosi Estadu sira, ha'u ko'alia ona ho ministru balun. Ha'u laiha oportunidade hodi ko'alia ho ministru Manipur, maibé ho sekretáriu Estadu nian. Ha'u iha informasaun sira hosi situasaun tomak no laiha motivu sira ba preokupasaun maka'as", deklara hosi governante.

Iha deklarasaun badak iha Twitter, primeiru-ministru Narendra Modi afirma ona katak nia akompaña hela situasaun, iha nafatin kontaktu ho autoridade lokál sira.

Rai-nakdoko senti mós iha Bangladexe, Myanmar (antigu Birmánia) ho Nepal, rejiaun ida ne'ebé akontese beibeik rai-nakdoko. Iha loron 25 Abril 2015, akontese iha Nepal rai-nakdoko ho magnitude 7,6 ne'ebé halo ema rihun sia mate no rihun 23 hetan kanek.

Uma rihun 600 resin hetan estraga tanba rai-nakdoko no répliku oioin.

SAPO TL ho Expresso