Xina finaliza aeroportu iha illa sira mak iha disputa no aviaun tun ona

Governu xinés konfirma katak finaliza ona konstrusun hosi aeroportu iha Yongshu Jiao iha illa Nansha (Spratly), no aviaun sivíl ida tun ona, no hamosu protestu hosi Vietname, nasaun ida ne’ebé mós reklama soberania iha arkipélagu ne’e.

Portavós Ministériu Negósiu Estranjeiru xinés nian, Hua Chunying, konfirma aviaun tun no esplika katak ne’e hanesan teste ba aeródromo foun no hodi komprova katak sira-nia instalasaun kumpre padraun hosi aviasaun sivíl, tuir ajénsia ofisiál Xinhua.

"Xina iha soberania indisputável iha illa sira Spratly no bee sira ne’ebé besik, no sei lasimu akuzasaun hosi Vietname ne’ebé la iha baze", tenik Hua, bainhira hatán ba protestu sira katak vou prodús iha Vietname.

Relasaun entre nasaun rua ne’e – ne’ebé iha loron-kinta estabelese "telefone mean" hodi estabelese kontaktu diretu iha matéria militár nian -- atravesa momentu di’ak ida, no Xina hein katak relasaun bele sai "sustentável, di’ak no estável", hatutan portavós ne’e.

Iha sábadu, portavós Ministériu Negósiu Estranjeiru vietnamita, Le Hai Binh, akuza Xina viola nia soberania no akordu mak foin halo entre parte rua ho aviaun tun.

Nasaun sira seluk iha rejiaun, hanesan Filipina, Malázia, Brunei no Taiwan mós reklama totál ka parsiál direitu ba illa sira Spratly, ne’ebé situa iha Tasi Xina parte súl.

SAPO TL ho Lusa