FORUM EKONOMIA GLOBAL CPLP, JORGE SERRANO: TL LA BELE FASE BIKAN FOER

Prezidenti Konfederasaun Emprezarial ba nasaun sira koalia lian Portugues (CPLP/Comunidade dos Países Lingua Portuguesa), Jorge Serrano, husu ba emprezarius Timor Leste (TL) tenki aproveita oportunidade Primeiru Forum Ekonomia Global CPLP ho diak.

‘’Hau hakarak hateten, Timor oan hotu ne’ebe partisipa tenki aproveita momentu ne’e, tanba ita sai uma nain, hau hatete bei-beik ona, keta halo ita halo tiha festa bot, ita iha ne’e fase deit bikan foer, hau lakohi ne’e, ita Timor oan tenki halo buat ruma ba rai ne’e liu husi Primeiru Forum Ekonomia Global CPLP ne’e,’’ hateten Jorge Serrano, hodi responde   JNDiario iha nia knar fatin Taibesi, Kuarta (24/02/2016).

Jorge Serrano mensiona katak, forum ne’e mos atu kria komunikasuan entre emprezariu nasional ho emprezariu CPLP, inklui Asia Pasifiku. Tan ne’e, iha forum ne’e kria B2B (Buseness to Buseness) ne’ebe orgaun autonomo uniaun Esportador ba CPLP mak sei halo akompanhamentu.

Kona ba asuntu interesante saida mak TL hanesan uma nain sei aprezenta iha forum ne’e, Jorge Serrano hateten, forum ne’e rasik naran forum ekonomia Global da CPLP ne’e hanesan forum internasional I foin lalais iha tinan kotuk simeria chefi Estadu nian TL rasik deklara katak, CPLP la bele koalia deit lingua, politika kultura no istoria, maibe tenki koalia ekonomia. Tan ne’e, iha forum ne’e TL oferese plataforma ida sai hanesan ponte ida ba negosiu CPLP ba Asia Pasiku no Asia Pasifiku ba CPLP.

‘’Ita hanesan ponte ida ne’ebe liga pais husi kontenente oin-oin. CPLP rasik iha kontenente 4, Portugal iha Europa, Brazil iha Amerika do sul, Mosambique no Angola sira iha Afrika, TL iha kontenente Asia, Timor rai kik ida, maibe iha oportunidade boot bele sai hanesan ponte ida ba negosiu,’’ esplika Jorge Serrano.

Nia hatutan, oportunidade diak tebes ba TL, tan e’e Timor oan tenke orgulho no tenke servisu maka’as, labele depende deit ba mina rai, maibe tenki diversifika ekonomia.

‘’Hau hnesan presidenti konfederasaun ita buka atu halo buat ruma ba rai ne’e liu-liu ba parte ekonomia, ita buka hadia povu nia moris, hare produtu ne’ebe povu sira kuda buka hadia kualidade depois esporta ba rai liur,’’ tenik Jorge Serrano.

Atu atrai investor CPLP inklui Asia Pasifiku mai investe iha TL, Jorge hateten, maneira ida mak TL loke odamatan ba ema hotu, maibe TL mos presiza hadia nia legislasaun balun no lei balun parte Governu mos tenki hare buat sira ne’e, maibe la signifika buat sira ne’e mak taka dalan, hakarak ka lakohi Timor nasaun ida iha nia povu ida, pais soberania moris iha soberania.

Jorge esplika katak, depois abertura sei ba visita stand ne’ebe iha, stand sira ne’e kompostu husi   intituisaun Estadu nian husi pais hotu inklui TL nian, stand ba emprejario no kompania sira, depois sei iha konferensia iha Ministeriu Negosio Estrangerio, depois orador iha forum ne’e mak eis Primeiru Ministru Xanana Gusmão atual Ministru Planeamentu Investimentu Estrategiku (MPIE), eis Presidenti da Republika Jose Ramos Horta no Presidente Zona Ekonomico Espesial Merkadu Sosial (ZEESM) Mari Alkatiri.

Orador huis Portugal Luis Amado, peritus, ekonomista sira sei mai fo palestra hodi intervene iha forum ne’e. Depois sei iha sala tematika iha aprezentasaun pais ida-ida nian iha oras ida nia laran no kontinua ho enkontru B2B.

“Ita orgulhu sai hanesan uma nain, maske ita ho kondisaun minimu foin ukun an, miabe ita bele halo buat ida ema barak fiar nune’e mai partisipa, ita nia ukun nain, Governu, politika sira suporta eventu ida ne’e, ita tenki promove TL ba liur, nune’e ita kria eventu ne’e konvida ema barak mai hare direta situasuan TL nian,’’ hateten Jorge Serrano. Nia

Jornal Nacional