GMHOP HALO OPERASAUN BA ANIMAL LAO LIVRE

Gestaun Merkadu e Hijiene Orden Publika (GMHOP) hala’o operasaun ba animal sira ne’ebe maka husik livre la’o ba mai iha sidade Dili nia laran.

Xefi Departamentu  GMHOP munisipiu Dili, Bonifasio Soares afirma, operasaun ba animal ne’e bazeia ba orden publika ne’ebe maka munisipiu Dili fo sai.

“Operasaun ida ne’ebe agora ita atu halo dau-dauk ne’e la’os hanesan bai-bain, tanba ne’e operasaun integradu mai husi orden publika, PNTL no seguransa sivil, nune’e ohin sira halo patrullamentu gabungan ne’e hare’e liu ba animal hirak ne’ebe maka lao namkari iha Dili laran husi bairo ba bairo, nune’e agora ita hahu uluk iha Becora maka sei kontinua nafatin ba suku seluk iha postu Cristo Rei, Nain Feto no Vera Cruz, tanba bai-bain ne’e ita halo patrulla deit ba animal sira ne’ebe ba mai iha estrada bo’ot ou dalan publiku sira,”Bonifasio Soares ba JN-Diário iha ninia knar fatin Administrasaun Munisipiu Dili, Matadouru-Dili, Segunda (28/03/2016).

Haktuir nia, komunidade husik animal la’o livre ne’e fo impaktu mos ba ema seluk ninia saude, tanba ne’e husi atividade GMHOP ne’e atu minimiza problema refere.

Xefi Departamentu  GMHOP munisipiu Dili, Bonifasio Soares hatutan liu tan katak, wainhira kaer komunidade ninia animal ne’ebe maka lao livre ne’e sei la fo fila ba nai’in animal sira.

Animal sira ne’ebe maka husi parte GMHOP oho ne’e bazeia ba dekretu lei nuneru 33/2008 iha artigu 9 to’o 11 hateten katak, animal ne’ebe maka prende husi AMD sei la entrega ba nain, e sasan sira ne’e hotu sei entrega ba ema kbiit laek, vuneravel, alejadu no labarik sira iha panti asuhan.

Nia dehan, guarda munisipal ne’ebe maka hala’o knar ba orden publika sidade Dili ne’e servisu lor-loron husi segunda to’o sesta e dalaruma iha emerjensia ruma ou iha orden de servisu Sabadu no Domingu mos funsionariu GMHOP halao servisu nafatin.

Entretantu Xefi Departamentu  GMHOP munisipiu Dili propoin ona ba Governu liu husi Ministeriu Estatal atu bele aumenta horas servisu ba seguransa guarda Municipiu (walikota) atu nune’e bele halo kontrola masimu ba vendedores ne’ebe sei kontinua fa’an sasan iha luron ninin.

“Dalabarak vendedor uza tempu meiodia hanesan ami fila ba han no horas sai servisu nian hodi aproveita fa’an sasan iha luron ninin ho situasaun hirak ne’e ami propoin ona ba Ministeriu Estatal karik bele aumenta tan horas kontrolu ba seguransa guarda Municipiu (walikota) atu nune’e bele halo kontrolu durante 12 horas de tempu iha loron ida nia laran hahu’u husi tuku 8.00 dader to’o tuku 19.00 kalan sem deskansa e tenki iha mós over time no hahan meiodia nian ba walikota ho nune’e sira lalika lakon tempu hodi ba han iha uma, maibe ate agora seidauk iha resposta husi Ministeriu refere,”reafirma Bonifacio.

Alende ne’e seguransa guarda Municipiu (walikota) labele halo kontrolu iha loron tomak nia laran, tanba seidauk iha orden de servisu ou autorizasaun husi Ministeriu kompetente.

“Pelumenus iha netik orden do servisu husi Ministeriu kompetente atu nune’e ami bele kaer baze legal ruma hodi hala’o servisu refere ho nune’e bele responsabiliza karik akontese buat ruma iha terenu ,”tenik nia. Ves/Ita

Jornal Nacional