MP Husu MSS Fasilita Pagamentu Ba Idozus

Membru Parlamentu (MP), Deputada Ilda Maria da Conçeicão, husu ba Ministerio Solidariedade Sosial (MSS) atu hadia sistema pagamentu ba benefisiario terseiru idade sira, tanba maioria la’o labele ona.

Nia dehan, pagamentu ne’ebe durante ne’e sira hala’o konsentra deit iha postu adminsitrativu, tanba ne’e benefisiario sira ne’ebe hela do’ok husi fatin konsentrasaun labele simu sira nia direitu.

“Iha suku Afoloicai, postu administrative Uato Carbau, benefisiarios nain 30 seidauk simu sira nia direitu hahu tinan kotuk 2015, tanba sira labele lao ona,” Deputada Ilda fo ezemplu, iha Parlamentu Nasional. 

Nia hateten, benefisiario sira husi suku ne’e tenke la’o ain 24 kilomentru mai iha postu administrativu hodi simu sira nia osan. 

Nia mos konkorda, bainhira benefisiario mak sei simu sira nia osan, labele reprezenta maibe tenke kria mos sistema ida ne’ebe bele fasilita benefisiario sira, tanba maioria la’o labele ona. 

“Ekipa pagamentu mak tenke ba tuir benefisiariu sira nian uma, tanba sira labele la’o ona,” nia sujere. 

Iha parte seluk, Diretor Regime Non Kontribuitivu MSS, Leoneto Vicente Faria Pereira, hateten sira sei halo verifikasaun ho pesoal tekniku sira iha baze, tanba ekipa banku sempre lori tuir osan ba iha benefisiario ne’ebe kondisaun moras. 

Atu labele akontese situasaun sira ne’e, nia husu, ba lideransa local sira atu identifika benefisiarios ne’ebe ho kondisaun moras, nune’e ekipa bele tun ba uma ida-idak, tanba ekipa sei la selu ba iha reprezentante. 

“Ekipa banku sempre husu ba lideransa local sira atu indentifika benefisiario sira ne’ebe moras no labele lao ekipa sei ba halo pagmentu iha sira nia uma,”  Diretor Pereira hateten. 

Nia hatutan, benefisiario sira ne’ebe naran aprovadu ona maibe la simu subsidio iha tinan anterior (2015), sira nia osan tama iha sira nia konta bankaria (la lakon), tanba governu loke ona konta bankaria ba benefisiarios ne’ebe naran iha lista aprovadu.

The Dili Weekly