VINGANSA VS KONSIENSIA

Jornal Nacional, editorial

Parlamentu Nasional, Tersa feira horseik aprova visita Presidente Republika,Taur Matan Ruak ba Japaun.Visita Xefi Estadu Republika Demokratika Timor Leste ba Japaun atu aprofunda relasaun bilateral pais rua nee iha futuru.

Visita Presidente Republika ba rai liur durante nee distintus deputado sira fo votus konfiansa, alias maioria a favor maibe aprovasaun visita Presidente Republika ba Japaun nee deputado maioria fo votus abstensaun, 36 deputadus ho votus abestensaun, afavor 12 no kontra zero.

Resultadu votus nee karik iha nasaun seluk hatudu katak nasaun nee iha situasaun krise nebe parlamentu la permite xefi estadu atu viajen ba rai liur?, ka deputado sira la fo importansia ba viajen xefi estadu ba rai liur?

Los duni, pela primeira vez parlamentu nasional timor nian fo votus 12 nebe permite visita Presidente Republika ba rai liur, maske laiha kontra maibe visita nee sei afraku politika ruma nebe asenta entre nasaun rua iha visita nee.

Agora duvida mak nee, Timor Leste iha duni krise nia laran? Votus abstasaun maioria duke aprova viajen nee ho konsensia deputado ida idak nian ka abstensaun nee atu espresa viganza orgaun soberano lejilstaivu nee nian ba Xefi Estadu?

Resultadu votus aprovasaun ba visita PR Taur Matan Ruak ba Japaun nee laos ona votus konsensia maibe votus viganza politika deputadus parlamentu Nasional ba Presidente Republika.

Baseia ba resultadu votus nee mos hatudu ona ba publiku, Timor Leste espesialmente no ba mundo jeralmente katak politika iha timor leste nee laos ona ba intrese povu tomak nian maibe intrese pesoal no partidaria.

Se politiku nain sira iha ona pensamento nebe defende estatus quo, defende intrese privado no partidaria hodi ignora tiha intrese povu tomak no nasaun nian mak povu no nasaun timor Leste nee atu sai saida iha tempo oin mai.

Hakarak ka lakohi, simu ka lasimu, nee mak realidade ita nia politiku nain sira, ne’ebe dalawain dehan maturidade politika, maibe la prontu simu kritika no autokritika ba erru nebe karik ita ida idak komete.

Maske ho votus 12, Presidente Republika bele ba Japaun maibe politikamente Xefi estadu laiha forsa atu toma dezisaun ruma iha visita nee tamba dezisaun hotu hotu sei hetan aprovasaun liu husi Parlamentu Nasional se Parlamentu rasik laiha konfiansa ba xefi estadu.

Deputado sira, li-liu bankada CNRT no FRETILIN lakon konfiansa ba Presidente Taur Matan Ruak baseia ba mesajen Presidenti Republika nian ba nasaun nebe konsidera Parlamentu nasional legaliza aktu governu hodi gasta osan estadu arbiru no mos votus unanimidade ba OJE kada tinan atu fahe poder no briveleju.

Agora se PR Taur koalia nee mak sala, nee fila fali ba Nain sira nebe ukun nee atu resolve oinsa? Ka situasaun ida nee kontinua too eleisaun jeral tuir mai (2017), mos laiha buat ida. Parlamentu ho Governu no Presidente Republika hela ba oposisaun tamba realidade laiha duni oposiaun iha Parlamentu nebe bele kontrola aktu governu.*