Ekonomia timoroan sei aumenta entre 04 no 06% - Banku Mundial

Ekonomia timoroan sei aumenta entre 04 no 06 % iha tinan hirak tuirmai, ne'ebé estimuladu ho investimentu públiku, ho setór petrolíferu tuun gradualmente to'o tinan previstu produsaun nian iha 2022, haktuir hosi Banku Mundial.

"Balansu fiskal sei fraku tanba reseita petrolíferu ki'ik no gastu públiku maka'as, no sei hamosu levantamentu maka'as iha Fundu Petrolíferu, aas liu duké rendimentu sustentável, no empréstimu balun", refere hosi instituisaun iha relatóriu ne'ebé fó sai iha loron-segunda ne'e.

"Hanesan rezultadu, saldu iha Fundu Petrolíferu sei tuun tinan-tinan", sublina no hatutan katak nasaun "hanesan fatin ida ne'ebé depende liu iha petróleu iha mundu", tama iha faze tranzisaun importante ho diminuisaun iha área ne'e.

"Atu kumpri tranzisaun susar ne'e ba nível rendimentu ida ne'ebé aas, nasaun hasoru dezafiu kona-bá oinsá uza sira nia rekursu limitadu sira no sentradu iha esforsu sira ba reforma hodi estimula investimentu no kria empregu sira", haktuir hosi estudu.

Análize halo parte hosi relatóriu ida hosi Banku Mundial kona-bá situasaun ekonómiku iha leste Ázia no Pasífiku nian, ne'ebé fó sai iha Washington ne'ebé refere kresimentu "fleksivel" hosi rejiaun, hodi haree desaselerasaun mínimu iha tinan hirak tuirmai.

Hatutan katak, previzaun ida sujeitu ba "risku aas sira" ne'ebé halo nasaun sira iha rejiaun mantén polítika monetáriu no fiskal sira ne'ebé "hamenus vulnerabilidade sira, hametin kredibilidade" hodi kontinua ho reforma estrutural importante sira.

Banku Mundial haree katak, iha nível rejional, kresimentu akonómiku tuun désimu rua hosi 6,3% iha tinan liubá ba 6,3% iha tinan ne'e, halo neineik ba 6,2% iha 2017 no 2018, balun tanba diminuisaun hosi kresimentu iha Xina ne'ebé karik sei tuun désimu rua hosi 6,9% ba 6,7% iha tinan ne'e no iha tinan 2017 ba 6,5%.

Iha kazu Timor-Leste nian estudu haree katak kresimentu ekonómiku ne'ebé laiha ligasaun ho petróleu iha Timor-Leste tuun maka'as iha 2013 ba 2,8% no rekupera ba 6% iha 2014 no monu fila fali ba 4% iha tinan liubá, valór ida ne'ebé ki'ik tebes hosi kresimentu iha inísiu dékada nian.

Maski kresimentu depende, liuliu hosi gastu públiku sira, infraestrutura sira no merkadu internu ne'ebé di'ak bele halo kresimentu boot ida hosi setór privadu iha tinan hirak tuirmai.

"Iha potensial ba dezenvolvimentu hosi área oioin iha Timor-Leste, tanba nia pozisaun jeográfiku ne'ebé besik hosi valor Austrália no Sudeste Aziátiku nian, inklui manufatura báziku, turizmu no agrikultura ki'ik", refere relatóriu.

Avansa iha infraestrutura báziku no hadi'a ambiente emprezarial - agora daudaun hanesan ladún atrativu iha mundu, haktuir hosi Banku Mundial - hanesan importante ba tranzisaun ekonómiku ne'e, ho reforsu hosi sistema sira rejistu empreza sira nian, rezolusaun ba konflitu sira no rai ho propriedade sira.

"Maski Timor-Leste iha buat barak atu oferese prezisa hasoru ho obstákulu krítiku sira ne'e antes, realistikamente, hein hodi atrai investimentu hosi liur no estimula emprezáriu doméstiku sira", konsidera relatóriu.

Iha área petrolíferu estudu fó hanoin katak dezenvolvimentu foun sira ne'ebé iha "impaktu maka'as iha indikadór makroekonómiku sira ho PIB, inklui produsaun petrolíferu hosi Área Konjuntu hosi Dezenvolvimentu Petrolíferu iha Tasi Timor, tuun hosi millaun rihun 6,8 iha 2012 ba millaun rihun 2,6 resin iha tinan liubá.

"Ne'e iha relasaun ba diminuisaun hosi folin sira hanesan diminuisaun hosi volume produsaun iha kampu sira", refere no hatutan katak reseita petrolíferu sira tuun hosi millaun rihun 3,9 iha 2013 ba millaun 960 iha tinan liubá.

Produtu timoroan seluk, kafé, hetan mós diminuisaun, tuun hosi dolár millaun rihun 18,8 (kilo millaun 34) iha 2012 ba millaun 15,8 (kilo millaun 17,6) iha 2013 no ba dolár millaun 13,8 (kilo millaun 10,2) iha 2014.

SAPO TL ho Lusa - Foto: António Casais