POVU TL TENKE ABITUA LEE LIVRUS

MAUBARA - Presidente repúblika husu ba povu Timor Leste tomak liu-liu ba estudante sira atu tenke abitua lee livrus nune’e bele dezenvolve ida-idak nian kapasidade.

Prezidente Repúblika (PR), Taur Matan Ruak hatete, iha nasaun seluk, estudante sira sei iha klase ki’ik maibé lee ona livru barak hodi aumenta estudante sira nia matenek, maibé iha Timor-Leste estudante sira ladun lee tanba biblioteka ladun iha, livru la barak.

“Livru falta ne’e tebes, iha Australia setimu klase ne’e lee ona livru atus 3 (300), ita nia livru laiha ne’e, iha timor ne’e dezemvolve de’it abitua atu ko’alia, maibé abitua atu hakerek no lee laiha,”Prezidente, Taur Matan Ruak hatete liu hosi diálogu komunitária iha suku Viviquini, postu administrativu Maubara, Munisípiu Likisa, Tersa, (29/03) hodi responde kona-ba probema komunidade nian.

Xefe estadu hatete, Timor-Leste tenki abitua ho lee no hakerek labele abitua de’it ho ko’alia, maibé persiza iha kondisoens ida maka tenki iha livru barak.

“Iha fatin balun biblioteka livru sira iha ne’e rai, rai moos de’it, ita ba husu sira dehan ta’uk foer ne’e maka la fahe ba estudante sra leee, maibé tuir loloos ne’e tenki fahe para estudante sira lee,”dehan PR Taur.

Xefe estadu hatutan tuir loloos livru sira ne’e tenki fó ba estudante sira lee, persiza mós orienta hodi nune’e estudante sira labele estraga livru la’os tanba atu estraga entaun la fó livru ba estudante sira para lee.

Durante ne’e estudante barak maka laiha livru para sira bele estuda rasik iha uma. Estudante sira só estuda matéria ne’ebé maka profesor sira hanoin maibé estuda rasik i ha livru sira laiha.

Iha fatin hanesan, Leonel de Jesus Carvalho hanesan komunidade hatete, durante ne’e nia sei konfuzaun oituan kona-ba matéria sira ne’ebé maka profesor uza hodi hanorin tanba dadauk ne’e livru sira seidauk barak.

“Ensinu aprendizazen iha eskola, materia lasubsiente, kona-ba hanoin ne’e maka ha’u dúvidas oituan tanba livru sira ne’e maka laiha,”Leonel de Jesus Carvalho.

Iha tempu okupasaun Indonesia estudante sira hetan livru para estuda iha uma maibé agora laiha livru ba estudante sira tanba ne’e nia dúvida estudante sira ne’e estuda matéria saida.

Nia husu ba governu atu bele tau matana ba problema livru hodi nune’e estudante sira estuda hosi aumenta sira nia kapasidade sobre matéria sira ne’ebé hanoin iha eskola.(dgx)

Timor Post