Trajédia foun iha Mediteráneu bele halo ema na'in atus resin mate

Relatu sira hatete katak ema na'in 400 lakon, barak liu migrante sira hosi Somália, tanba ró ne'ebé mout iha tasi-ibun Ejiptu nian ne'ebé karik sira nia destinu mai iha Europa.

Prezidente italianu Sergio Mattarella hatete iha loron-segunda katak, haktuir hosi ajénsia Reuters, akontese ona trajédia foun ida ho migrante sira iha Mediteráneu ne'ebé karik "mate ema atus resin".

Relatu sira hatete katak ema na'in 400 lakon, barak liu migrante sira hosi Somália, tanba ró ne'ebé mout iha tasi-ibun Ejiptu nian ne'ebé karik sira nia destinu mai iha Europa.

Mattarella, ne'ebé ko'alia iha serimónia ida iha Roma, hatete katak Europa tenki reflete "hasoru trajédia ida tan iha Mediteráneu ne'ebé karik mate ona ema atus resin", nia hatete maibé la fó pormenór sira.

Trajédia mosu liutiha tinan ida hosi akontesimentu ida seluk ne'ebé halo ona refujiadu na'in 800 resin mate iha Mediteráneu.

Diplomata somali ida iha Ejiptu konfirma ona relatu sira, haktuir hosi BBC. Sobrevivente balun karik lori ona ba illa sire gregu nian.

Iha loron-segunda ne'e mós hetan ona ró ida iha tasi-ibun Líbia nian ne'ebé lori ema na'in 40 resin iha ró laran. Ró ne'e nakonu ho bee bainhira guarda-kosteira italianu sira hetan. Pasajeiru na'in neen mate ona bainhira pasajeiru sira seluk hetan tulun no sei lori ba illa Lampedusa.

Hahú hosi inísiu tinan ne'e, ema 177.200 to'o ona ba Europa liuhosi Mediteráneu, haktuir hosi balansu ikus hosi Organizasaun Internasional Migrasaun sira nian (IOM). Ema na'in 153.500 maka to'o ona iha Grésia no na'in 23.170 resin maka to'o iha Itália.

Iha períudu hanesan, ema na'in 375 mate ka lakon ona iha dalan marítimu oriental (ba Grésia no Xipre) no na'in 352 iha dalan sentral (ba Itália), haktuir hosi organizasaun.

SAPO TL - Fonte: Renascença