3800 Jovens Kapasitadu, 58% Dezempregu

Oras ne’e dadaun jovens nain 3800 simu ona sertifikadu kualifikasaun iha area oi-oin, maibe maioria (58%) la hetan servisu (dezempregu) tuir peskiza Sekretariado Estado Politika Formasaun Profesional e Empregu(SEPFOPE) iha tinan 2015.

Diretor Jeral SEPFOPE, Jacinto Barros Gusmão hateten lolos joven sira ne’e iha ona skill no abilidade atu tama iha merkadu, maibe tanba kampu servisu limitado, entaun sira kontinua dezempregu. 

“Ami nia peskiza three study hatudu katak husi ema rihun tolu resin ne’e 42% mak hetan servisu iha 58% mak la hetan servisu tanba vaga servisu limitado,” nia hateten.  

Nia hatutan, 42% ne’ebe hetan servisu ne’e iha area konstrusaun, banku, lojas, restorante no seluk tan inklui mos mekanika. 

Atu hariku vaga servisu ba jovens iha rai laran, nia dehan, governu agora dadaun halo reforma ba administrasaun, fiscal, ekonomia no legislasaun, hodi hadia no garantia sustentabilidade ekonomia Timor-Leste nian. 

Tuir kompromisio nasional governu nian, nia hateten, kada tinan SEPFOPE tenke forma jovens hamutuk nain 2500 iha area lingua, konstrusaun, carpinteiru no seluk tan, maibe numeru ida ne’e sa’e maka’as tanba sentru formasaun ne’ebe eziste iha Timor hamutuk 50 resin. 

Iha parte seluk joventude Cesarino Gonsalves, hateten problema bo’ot ne’ebe joven sira hasoru mak limitasaun kampu servisu iha rai laran, tanba Timor –Leste seidauk iha industria hodi fo servisu ba joven sira. 

Nia mos apresia esforsu SEPFOPE nian hodi fo formasaun ba joven sira no haruka sira ba servisu iha ema nia rain, maske numeru dezempregu kontinu aas. 

“Ita haree kada tinan SEPFOPE kria formasaun oioin kona ba lingua, tekniku no industria, maibe realidade ita nia nasaun laiha fabrika hodi integra ita nia rekursu humanu ne’ebe kapasitadu ne’e,” nia dehan.

Nia dehan, joven barak iha area rural iha inisiativa atu hala’o servisu agrikultura, maibe laiha supporta liu –liu ekipamentus inklui mos asesu ba merkadu. 

Entretantu Membru Parlamentu Virgilio da Costa Hornai, hateten SEPFOPE iha responsabilidade atu forma no kapasita joven sira atu kompete iha merkadu, la’os loke kampu servisu. 

“Hau hanoin katak ita nia joven sira nia inisiativa no kreatividade mak seidauk, liu –liu atu explora potensialidade ne’ebe iha hodi hetan rendimentu,” nia hateten.

The Dili Weekly