Primeiru-ministru
timoroan, Rui Maria de Araújo, hakerek ona ba nia homólogu portugés hodi hato'o
"felisitasaun maka'as ba selesaun portugeza no ba ema portugés tomak"
tanba vitória ne'ebé hetan iha kampeonatu europeu futebol nian.
"Ha'u
husu atu transmiti ba ekipa portugeza no ba selesionadór nasional ami nia
parabéns no mós ami nia agradesimentu sira ba forma oinsá imi fó inspirasaun
mai ami hodi hatudu katak ho esforsu, dedikasaun, rezisténsia no perzeveransa
maka iha posibilidade", nia hakerek.
Iha
karta ne'ebé haruka ba António Costa no ne'ebé husik "Viva" ba
Portugal no Timor-Leste, Rui Araújo fó hanoin festa boot sira ne'ebé maka
vitória portugeza hetan iha fatin oioin iha Timor-Leste.
"Dala
ida tan, agora hafoin vitória iha final, Timor-Leste hadeer ho timoroan rihun
resin selebra glória Portugal nian, ho sentimentu ksolok ida, amizade no
solidariedade ne'ebé bele hetan de'it iha nasaun maun-alin sira hanesan
Timor-Leste ho Portugal", nia hakerek mós.
Ema
portugés sira iha Díli, iha loron hirak ikus ne'e, rona beibeik liafuan
parabéns hosi ema timoroan sira ne'ebé sira hasoru iha estrada no vitória
Portugal nia hetan basa-liman ida hosi plenáriu Parlamentu Nasional iha
loron-tersa ne'e.
"Hodi
ha'u nia naran no parlamentu nian ha'u hakarak hato'o parabéns ba Estadu no ba
povu portugés tanba selesaun nasional sai duni vensedora hosi kampeonatu Europa
nian", hatete hosi prezidente parlamentu timoroan nian, Adérito Hugo da
Costa.
"Povu
Timor-Leste selebra ona vitória ne'e ho festa boot iha estrada sira Díli nian
no iha fatin sira seluk iha nasaun ne'e. Parabéns", nia hatete bainhira
hahú sesaun plenáriu iha loron-tersa no hamosu basa-liman maka'as hosi deputadu
sira no públiku sira.
Komunidade
portugeza iha Díli agradese ona iha loron-kinta ne'e, ho dalan simbóliku, ho
faixa ida ne'ebé instaladu iha estrada ida iha sidade, apoiu maka'as ne'ebé
populasaun timoroan fó ba kampaña hosi selesaun iha Kampeonatu Europeu 2016
nian.
"Obrigada
Barak Timor-Leste ba apoiu ba ami nia selesaun", bele le iha faixa ne'ebé
grupu ida portugés sira haruka halo no tau iha loron-tersa ne'e iha estrada ida
iha sentru sidade nian.
Faixa,
"asinadu" hosi "komunidade portugeza Timor-Leste nian" iha
imajen ida selesaun nian ho tasa Euro 2016 no logo ida ne'ebé tau hamutuk
bandeira rua hosi Timor-Leste no Portugal nian.
"Ksolok
no entuziasmu ne'ebé populasaun Timor-Leste sira hatudu hanesan estraordiáriu
tebes no akollimentu hosi líder nasional sira rasik hanesan maka'as nune'e ami
senti obrigasaun moral hodi hato'o obrigada ba Timor tanba apoiu", hatete
hosi portugeza ida, ne'ebé envolve iha inisiativa ne'e, ba Lusa no hatutan
katak "Timor la toba bainhira selesaun portugeza joga".
Inisiativa
ne'e, hosi grupu ida portugés sira iha Timor-Leste hakarak agradese saida maka
sira konsidera hanesan apoiu fantástiku ida hosi timoroan sira ba vitória sira
hosi Portugal iha Fransa ho karavana naruk sira no bandeira portugeza rihun
resin hodi selebra.
Festa
boot sira ne'e akontese hafoin enkontru sira iha meia-final no iha final, ho
líder istóriku timoroan rasik, Xanana Gusmão, hamutuk hodi halo selebrasaun
sira, tuur iha karreta ida nia janela hodi kaer bandeira portugeza.
Hala'o
daudaun petisaun ida hodi nune'e delegasaun ida hosi selesaun portugeza nian
ne'ebé manán Europeu Futebol nian vizita Timor-Leste.
SAPO
TL ho Lusa
Sem comentários:
Enviar um comentário