PROJETU ELEKTRISIDADE, GOVERNU SEIDAUK SELU KOMPAÑIA 144

Governu seidauk  halo pagamentu ba kompañia 144  ne’ebe kaer projetu elektrisidade.

“Prosesu  la’o hela,    agora ita ba oin dehan hotu kedas ne’e labele, sasan sei la’o pagamentu mos tuir nia prosesu,”esplika Vise Ministru Obras Publikas Transportes Komunikasoens  (MOPTK), Januario  da Costa Pereira ba jornalista iha Palasiu Governu, Sesta (15/07).

Januario Pereira  dehan,  agora ekipa  iha terenu halo hela verifikasaun depois sira to’o mai  maka halo esbosu kontratu ida lori ba Tribunal Kontas  para bele fo vistu previu  hafoin bele prosesa.

“Kontratu  ladauk  iha, tanba ami publika tuir lei  katak, ami publika katak lolos ne’e labele,”dehan Januario Pereira.

Nune’e mos  Januario Pereira responde mos ba  preokupasaun Administrador Postu  Administrativu Bobonaro, Munisipiu Bobonaro,  Rui Beremau Barros nian ne’ebe maka hato’o kona-ba iha Postu Administrativu Bobonaro,  iha Aldeia 21 maka to’o agora seidauk asesu ba eletrisidade, tanba deskonfia impede husi Veteranus sira iha Postu Administrativu Bobonaro.

“Ita labele  hanoin katak, fin de mundu tiha ona, prosesu lao hela,”dehan  Januario Pereira.

Antes ne’e mos Vise Ministru Finansas Helder Lopes hateten, Orsamentu Ratifikativu (OR)   uza ba projetu bo’ot no estratejiku sira  hanesan Portu Tibar,  drainazen Dili, Suai Supply base ne’e hamutuk  U$197.7 milloens  ka ida kuaze  50,6% husi total OR, signifika OR  ne’e 50,6% maka  aloka ba projetu estratejiku sira ne’e.

“Agora  ba selu divida ne’e hamutuk.   Primeiru ba projetu emerjensia  ne’ebe maka uluk  ita implementa  maibe  ita seidauk selu ne’e  hamutuk  U$51,4 milhoens  ka 13,1% deit.  Depois ba  projetu eletrisidade   ne’ebeke  lao ona depois berefikadu ona  ita seidauk selu  ne’e valor ne’ebeke  ita  tau iha proposta OR ne’e U$29,7 milloens ou  7,6% deit,”dehan Helder Lopes.

Ne’ebe atu hateten deit  OR maioria para selu projetu sira tolu  ne’ebe maka temi ona, 50,6%  selu projetu bo’ot  tolu ne’e.

Depois U$111,7 ne’e milloens  ne’e   ba projetu ne’ebe maka la’o ne’e presiza tan  osan hodi selu,  divida ne’e tau hamutuk selu  menus husi 20% husi total OR.avi

Jornal Nacional