REKONSILIASAUN…!!!

Jornal Nacional, editorial

Timor oan eis pro otonomia  iha tempo okupasaun indonesia iha Timor Leste nebe halai ba indonesia iha tinan 1999 dadaun nee komesa buka meus ba estadu Timor Leste atu halo rekonsiliasaun hodi resolve problema pasadu atu nunee labele rai hela problema ba sira nia bei-oan sira.

Proposta rekonsiliasaun nee diak teb-tebes ba estadu Timor Leste maibe Presidente Republika Demokratika Timor Leste simu ho malirin ideia sira nee hodi hatete rekosiliasaun nee presiza tempu tamba tauk rekosiliasaun nee lao bele hamosu problema foun iha nasaun nee.

“Prezidenti Repúblika dehan katak, ami lori imi mai, keta halo fali problema ida iha ne’e, problema ne’e mak, nia mai hakarak foti fali nia uma, iha ne’e lakohi fó,” hasara Mateus Maia.

Los duni senhor, Presidente Republika tenki tetu didiak lai antes toma dezisaun ba proposta nebe iha, problema eis pro otonomia ho pro kemerdekaan nee laos buat halimar nian, probelam nebe lori ema lakon riku soin, terus no mate.

Laiha buat ida, bele hatete nee kulpa funu ninian maibe vitima no familia vitima maske tinan 17 nee ona balu fuan sei kanek tamba lakon riku soin, balu terus alejadu no balu lakon familia nebe sira hadomi tebes.

Agora koalia rekonsiliasaun laos foin primeira vez, antigu Presidente Republika, Xanana Gusmão halo rekonsiliasaun dala barak ho timor oan sira nebe halai ba indonesia iha 1999, resultadu ema barak fila mai timor laiha problema.

Laos nee deit, lider liebrtadora nee mos halo rekonsiliasaun ho nasaun indonesia nebe ikus nasaun rua harii Komisi Kebenaran dan Perdamain nebe ikus mai hamosu deklarasaun ida katak nasaun rua haluha problema pasadu no hamutuk lao ba oin.

Nunee mos igreja hola parte iha rekonsiliasaun minisipal, distritu ida idak organiza rekonsiliasaun rasik, Municipiu Manatuto konsege realiza rekonsiliasaun iha tinan rua ba kotuk nebe Manatutu oan sira rasik mak simu malu, halo rekosiliasaun ba malu, laiha buat ida akontese.

Rekonsiliasaun nebe Maun Boot Xanana organiza, ohin loron eis pro otonomia barak tama sa timor laiha buat ida akontese ba sira, familia balu ikus mai tama militar, tama polisia, funsionariu no membru orgaun estadu nian.

Ohin loron nee laiha ona eis pro otonomia ka pro independensia, hotu hotu mesak timor oan, ema sira nebe uluk moris ho SGI, halo operasaun nho kareta 1001, sira ohin loron tama sai Dili, laiha ema ida book.

Povu ohin loron nee preokupa liu ba sira nia vida, sira lakohi preokupa ba ema seluk nia vida, buat hotu iha lei mak manda. Agora komete krime nee labele tolera, tenki liu husi prosesu justisa atu fo justisa ba vitima no familia vitima sira.

Agora proposta atu rekonsiliasaun iha tempo agora nee halo ema balu duvida, rekonsiliasaun atu foti fila fali sira nia propriedade, uma no rai nebe maluk timor oan seluk okupa ka implesmente resolve problema pasadu nian atu labele daet too bei-oan sira.

Ne’ebe atu hakarak fila fali mai imi nia rai moris fatin, la presiza rekonsiliasaun tan tamba ema barak ohin loron nee fila ona mai timor hodi halao sira nia moris hanesan bain-bain, laiha ema ida mak impende. Timor nee ami nian, Timor nee imi nian no timor nee ita hotu nian, naran katak fila fali mai ho intensaun diak hodi kontribui ba paz, domin, dame no dezenvolvimentu rai ida nee. *