UNDP Apoia $300,000 Estabelese Klinika Judisiariu

United Nation Development Program (UNDP) apoia orsamentu $300,000 ba Instituisaun Defensoria Publiku (IDP) hodi estabelese Klinika Judisial iha Munisipiu rua (Baucau no Covalima).

Prezidente Defensor Publiku, Sergio Hornai, hateten orsamentu ne’e sei aloka ba atividade sosializasaun kona ba objetivu estabelesementu klinika judicial iha komunidade nia le’et.

“Ita tenke introdus ba komunidades, atu nune’e sira bele hatene, hodi sira abitua, e ita mos uza osan ne’e atu selu ema sira ne’ebe halo’o knar iha baze,” Hornai hateten.

Inisativa ida ne’e, nia hateten mai husi Ministeriu Justisa (V governu), maibe foin implementa iha tinan ne’e (2016) no Defensoria Publiku hetan fiar hodi ezekuta programa ne’e.

Iha mos objetivu husi klinika judisiariu ne’e, nia esplika atu komunidade iha area rural bele hatene kona ba leis saida deit mak durante ne’e vigor ona iha rai laran.

“Wainhira sira hasoru problema karik, fasil ba sira atu enkaminha mai iha intituisaun judicial sira,” nia hateten.

Nia informa, tipe krimes hanesan hadau malu rai, violensia domestia inklui kazu integridade fisika simples sempre akontese iha komunidade nia le’et.

“Maibe sira lahatene lei, talves sira buka atu oho malu, tuku malu,” nia dehan.

Antes klinika ne’e estabelese, nia dehan sira sei halo koordenasaun profundu ho organizasaun hanesan JMSP no Belun, oinsa bele tau hamutuk hanoin ba dezenvolvementu klinika ne’e.

“Ita dezenvolve hela termus referensia, guia hodi uza ba atribuisaun no nia servisu to’o iha ne’ebe inklui nia kompetensia to’o iha ne’ebe,” nia dehan.

Iha parte seluk Membru Parlamentu (MP) Arao Noe, hateten klinika ne’e sei ajuda komunidade sira atu asesu ba justisa diak liu tan iha future.

“Ne’e diak tanba komunidade bele informadu kona ba lei sira ne’e,” nia hateten.

Maibe, nia sujere, governu tenke organiza didiak atu nune’e komunidade bele hetan nia benefisiu lolos.

The Dili Weekly