Autoridade sira duun Renamo ba atake foun iha norte Mosambike nian

Atake foun ida ne'ebé autoridade sira duun ba mane armadu sira hosi Rezisténsia Nasional Mosambikanu (Renamo) akontese iha loron-segunda madrugada iha provínsia Niassa, norte Mosambike nian.

Administradora hosi distritu Metarica, Edite Ramalho, afirma ona, haktuir hosi Rádio Moçambique, katak, durante invazaun, ema armadu sira hosi Renamo, partidu opozisaun prinsipal, sunu sekretaria hosi postu administrativu Nacuma nian no postu polisial ida, hala'o estraga balun iha rezidénsia xefe postu nian no tama iha sentru saúde.

"Ami nia ema protesaun sira iha ne'ebá, maski ami, hanesan governu, iha ona dalan. Ami sei halo levantamentu ida kona-ba saida maka hetan estraga no saida maka sira naok no nune'e ami bele hato'o tan informasaun sira", hatete hosi Edite Ramalho.

Ho akontesimentu iha loron-segunda madrugada, hamutuk ona atake tolu ne'ebé maka autoridade mosambikanu sira atribui ba Renamo iha semana rua ikus ne'e iha provínsia Niassa, hafoin invazaun hasoru lokalidade Muapula no postu administrativu Maiaca, iha distritu Maúa.

Líder hosi Renamo, Afonso Dhlakama, hatete ona iha semana liubá, iha entrevista ba Kanal Mosambike nian, katak movimentu loke ona frente konfrontasaun foun ida iha provínsia Niassa.

"Ataka ona eskuadra ida iha Maúa, iha Niassa, tanba ami loke ona frente ida iha ne'ebá iha semana liubá", hatete hosi líder opozisaun, hodi refere ba provínsia ida ne'ebé ladún iha epizódiu sira violénsia polítika nian.

Negosiasaun sira dame nian iha Mosambike, ne'ebé para hahú loron 27 Jullu, hahú fali iha loron-segunda ne'e ho partisipasaun hosi mediadór internasional oioin.

Suspensaun hosi negosiasaun sira ne'e justifika ho kestaun lojístiku sira.

Diálogu entre Governu mosambikanu no Renamo foka hela iha pontu dahuluk ajenda nian, kona-ba ezijénsia hosi partidu prinsipal opozisaun nian hodi governa iha provínsia neen ne'ebé sira reivindika vitória iha eleisaun jeral sira iha 2014 nian.

Renamo la rekoñese rezultadu sira hosi eleisaun jeral sira 2014 nian no husu atu governa iha provínsia Sofala, Tete, Manica no Zambézia, iha sentru Mosambike nian, no mós iha Niassa no Nampula, iha norte.

Rejiaun sentru Mosambike nian hetan beibeik epizódiu sira konfrontu nian entre tropa sira hosi Renamo no Forsa sira Defeza no Seguransa nian, aleinde kesar barak kona-ba naok no asasíniu sira ba dirijente polítiku sira hosi parte rua ne'e.

Autoridade sira duun Renamo ba atake sira hasoru unidade sira saúde nian iha semana hirak ikus ne'e no emboskada iha estrada prinsipal sira iha sentru nasaun nian ne'ebé monta ona eskolta militar obrigatóriu sira iha parte tolu hosi dala rua ne'e.

SAPO TL ho Lusa - Foto: André Catueira / EPA