HAK HUSU PR LABELE PROMULGA OR

Asosiasaun HAK husu ba Prezidenti Repúblika (PR) Taur Matan Ruak atu labele promulga Orsamentu Retifikativu (OR), tanba konsidera katak Estadu komesa husik ninia responsabilidade ba ninia sidadaun.

“Ha’u nia pontu de vista maka ne’e orsamentu retifikativu só para atu selu no halo de’it ba drainajen iha Díli laran, halo portu Tibar, projetu Tasi Mane iha Suai supply baze no ho despeza sira ne’ebé maka liu tiha ona tinan kotuk. Ne’ebé mai ami, di’ak liu Prezidenti Repúblika (PR) lalika promulga ou retifika orsamentu retifikativu, tanba husi monitorizasaun asosiasaun HAK ninian hatudu katak Estadu ne’e semakin hadook ninia responsabilidade no husik ninia responsabilidade ba ninia sidadaun,” dehan Manuel Monteiro ba JN-Diário iha Centro Convenções de Díli, Kuarta (03/08/2016).

Nia esplika, HAK ejiji PR labele promulga tanba asuntu ida ne’ebé maka fundamentu teb-tebes hanesan bee moos hodi fornese ba sidadaun TL de’it mós Governu la investe, maibé entrega fali ba Asian Development Bank (ADB) maka investe, depois halo privatizasaun ba bee entaun sidadaun tenki selu bee moos.

“Tuir loloos ne’e bee moos ne’e direitu fundamentu ou primáriu, la’os direitu sekundáriu, nune’e maka Estadu tenki hakonu, imajina de’it sé ita laiha bee moos ita bele moris ka? Entaun tanba saida maka Estadu ejiji ninia sidadaun tenki selu bee moos, ne’e signifika Estadu hadook ninia responsabilidade ba ninia sidadaun rasik,” dehan Diretor Asosiasaun HAK ne’e.

Alénde ne’e, tenik Manuel Monteiro, loloos ne’e só Governu maka iha poder atu garante kualidade ensinu primária ba sidadaun sira atu hetan ninia direitu loloos, tanba hotu-hotu hatene katak eskola ne’e baze direitu fundamentu povu ninian, maibé informasaun ne’ebé  iha, sita katak kuríkulu edukasaun de’it mós sei uza kurikulu nasionál ninian tanba hotu tiha ona, tanba sá maka Governu liu husi Ministériu Edukasaun (ME) labele produz.

“Konabá saúde ninian faktu ne’e ita la bosok tanba Hospital Nasional Guido Valadares (HNGV) fasilidade laiha no la to’o. Nune’e mós dalan ba Munisípiu, postu administrativu no suku sira ne’e kontinua ladi’ak ninia efeitu maka ema sulin hotu mai Díli, tanba saida maka orsamentu retifikativu ne’e ita uza atu halo fali drainajen iha Díli laran,” tenik Manuel Monteiro.

Entretantu Diretor Ezekutivu Forum Organizasaun Não Govermenatal Timor-Leste (FONGTIL), Arsenio Pereira da Silva hateten katak, FONGTIL ninian pozisaun katak tuir loloos orsamentu retifkativu ne’e hatama ba orsamentu 2017 ninian.

“Ami nia pozisaun ba orsamentu retifikativu ne’e tuir loloos hatama ba orsamentu 2017 tanba orsamentu 2016 ne’e tenki remata lai, mezmu ita hatene katak tinan 2016 besik remata ona maibé orsamentu 2016 ne’e balun seidauk ezekuta hotu, entaun ami hanoin katak tanba saida maka tenki retifika, maibé identifikasaun husi Governu katak orsamentu refikativu ne’e tanba tinan 2017 ne’e tama ba eleisaun ita tenki hein membru Parlamentu Nasional (PN) no Governu foun entaun dalaruma ne’e maka ninia implikasaun, maibé tuir loloos labele hanesan ne’e, mezmu eleisaun maibé mákina Estadu no Governu tenki la’o nafatin,” Diretor Ezekutivu FONGTIL ne’e esplika.ves

Jornal Nacional