DILI,
(ANTIL) – Prezidente Repúblika, Taur Matan Ruak hateten nasaun ne’ebé iha
sistema edukasaun di´ak, sempre iha futuru ne’ebé di’ak. Tamba ne’e
investimentu iha setór edukasaun maka xave ba Timor-Leste nia futuru.
Xefi
Estadu hateten lia hirak ne’e iha nia mensajem estadu hodi kongratula
loronmundiál profesores sira ne’ebe monu iha 5 Outubru iha komunikadu imprensa
ne’ebe redasaun ANTIL simu iha Kinta (13/10).
“Investimentu
iha setór edukasaun maka xave ba Timor-Leste nia futuru tanba, nasaun ne’ebé
iha sistema edukasaun di´ak, sempre iha futuru ne’ebé di’ak. Maibé, ko’alia
kona-ba setór edukasaun, la’ós de’it konstrusaun fíziku eskola ne’ebé di’ak,
sala aula ne’ebé di’ak, livru ne’ebé di’ak, maibé importante maka iha profesór
sira ne’ebé kualifikadu atu forma ema kualifikadu,” xefe estadu haklaken.
Tamba
ne’e, ema numeru ida iha nasaun ne’e, husu ba profesor sira atu serbisu
hamutuk, serbisu maka’as liu-tan hodi transforma setór edukasaun atu sai
hanesan pilár determinante ida iha prosesu dezenvolvimentu.
“Profesór
maka fundasaun prinsipál atu forma no prepara ema, inklui determina kualidade
ba Timor-Leste nia rekursu úmanu iha futuru,” xefe estadu dehan.
Kna’ar
hanesan profesór importante tebes iha tempu ukun-án ne’e tanba, forma liu-tan
ema ho badinas ho onestu. Profisaun ida ne’e okupa fatin espesiál tebes iha
sosiedade nia leet. Através sira nia sakrifísiu no dedikasaun hasoru
defikulades hodi forma ema, halo profesór sira sai heroi tebes iha tempu ukun-án
ne’e.
“Ha’u
fó parabéns ba aniversáriu loron mundiál profesór sira nian, agradese tebes
ita-boot sira nia dedikasaun, prontidaun, kompromisu atu serbi ho badinas, ho
onestidade sein reklamasoens. Ha’u laiha liafuan atu agradese ita-boot sira nia
esforsu tomak hodi transforma, fasilita ema ida sai ema kompletu. Maibé,
hakarak dehan, Timor-Leste sei la’o ba oin maka’as tebes tanba, iha serbidór
hanesan ita-boot iha tempu ukun-án ne’e. Tanba, ita-boot sira fasilita Timoroan
hotu atu deskobre sira nia án no sira nia futuru,” xefe estadu dehan. (Jornalista:
Xisto Freitas / Editor: Gantry Meilana)
Foto:
Prezidente Repúblika, Taur Matan Ruak, foti liman ba profesór sira iha Suku
Aituto, Munisípiu Ainaro, nu´udar votus parabéns ba sira nia loron. Foto Mídia
Palásiu Prezidénsia Repúblika.
Sem comentários:
Enviar um comentário