Estudante Mak Sentru ba Universidade

DILI, (ANTIL) – Reitór Universidade Nasionál Timor Lorosa’e (UNTL), Francisco Miguel Martins hatete, universidade nu’udar fatin atu eduka estudante sira sai futuru nasaun no sentru ba universidade.

“Ha’u-nia prioridade mak estudante, ami iha ne’e tanba estudante. Ita hothotu iha ne’e hasae kapasidade estudante sira nian, para sai futuru ba país ida ne’e,” reitór UNTL ne’e ba estudante UNTL sira iha Kampus Sentrál, UNTL, Kinta (17/11).

Komemorasaun ne’e atu hanoin fali tinan 16 liuba, buat ida laiha maibé la’o to’o agora ho di’ak. Universidade ne’e di’ak ba bebeik tanba ita hotu nia kontribuisaun. La’ós ema ida, rua nia kontribuisaun maibé hothotu nia kontribuisaun.

Instituisaun atu eleva kualidade, atu fó oportunidade ba nia estudante atu aprende buat barak. Tanba ne’e, estudante nu’udar futuru lideransa nasaun, futuru Timor-Leste presiza, rona no haree mak foti konkluzaun, ne’e mak komunidade akadémika, aborda ho responsabilidade akadémika, responsabilidade sientífika.

Responsabilidade sientífika katak verdade. Ita-nia lema mak sapienta et veritas katak sabedoria (matenek) no verdade (loos) tanba ida ne’e iha situasaun hanesan ne’e estudante sira iha direitu atu husu, estudante sira iha direitu atu husu buat ruma ne´ebé mak karik la loos.

“Se ita taka dalan labele halo nia husu ne´e feodalismo ka buat ida antigu karik dehan ditadura, labele. Ita hanorin ita nia estudante sira sai ema demokrátiku, aberta no esklaresimentu loloos,” salienta reitór UNTL.

Reitór Francisco Miguel Martins reforsa, espíritu atu dezenvolve rekursu úmanu iha UNTL la mate, ita moris la’ós de’it tanba osan estadu nian, ita moris ho ita-nia konsiénsia, harii universidade ho konsiénsia iha ahu kdesan laran.

“Ita laiha buat ida bainhira harii universidade, ohin loron governu rekoñese, ita nia governu finansia, tau ona iha orsamentu estadu nu’udar ajénsia estadu nian,” katak tan reitór Francisco Miguel Martins. “Ne’e esforsu boot ne’ebé ita halo maibé ita mós tenke kumpre regras orsamentu estadu tanba ita sidadaun tenke respeita lei no orden”.

UNTL harii iha 2000 no universidade ne’e nu’udar transformasaun husi Universitas Timor Timur(UNTIM) ne’ebé altura ne’ebá harii ho inisiativa husi governadór Mário Viegas Carrascalão. (jornalista: Rafy Belo; editora: Rita Almeida)

Foto: Reitór Universidade Nacional Timor Lorosa’e (UNTL), Francisco Miguel Martins