Grotus, Asika no Noi Diwake Iha Ona Sentru Jestaun Krokodilu

HERA, (ANTIL) - Governu Timor-Leste liuhusi Ministeriu  Komérsiu Indústria no Ambiente, estabelese ona Sentru Jestaun Krokodilu iha Hera, Dili, Kinta (10/1/2016). Inaugurasaun sentru ne’e, simboliza liuhusi haki’ak lafahek tolu, Grotus Slebor (lafaek aman), Asika (Lafaek Inan) no Noi Diwake, lafahek Inan.

Husi Krokodilu tolu ne’e, Grotus Slebor mai husi Autoridade Munisipál Dili ne’ebé durante ne’e haki’ak  iha Markoni, Fatuhada honia medida métru 2,30.  Asika mai husi munisípiu Manufahi, durante ne’e haki’ak iha área Welala, suku Letefoho, Postu Administrativu Same ho nia métru 1,70 no Noi Diwake mai husi munisípiu Baukau ne’ebe durante ne’e haki’ak iha suku Bahú, Postu Administrativu Baukau ho métru 1,30.

Hafoin inaugurasaun ba Sentru Jestaun Krokodilu, Ministru Komérsiu Indústria no Ambiente, Constâncio Pinto ba ANTIL,  hateten, lafahek tolu mak oras ne’e iha ona sentru jestaun refere maibé sei kaer tan krokodilu iha tasi ibun sira bainhira hetan.

Tuir ministru, konservasaun ba lafahek iha oin rua, mak insitu no exitu. Insitu signifika, fatin ne’ebé lafahek moris nanis ona, mota ka tasi. Husi ne’eba, MKIA sei koopera ho autoridade lokál atu proteje tiha fatin ne’e, atu  lafahek bele hela nafatin iha fatin protejidu . Exitu  signifika, muda tiha lafahek husi fatin ruma ne’ebe eziste, lori ba haki’ak iha sentru jestaun.

Ministru Constancio husu ba komunidade sira, bainhira hetan lafahek iha área ne’ebé ameasa komunidade, tenki fó hatene ba Ministériu Komérsiu no Ambiente (MKIA), liuliu Diresaun Nasionál ba Biodiversidade atubele kaer hodi lori ba sentru jestaun krokodilu iha Hera. (jornalista: Maria Auxiliadora/Editor: Otelio Ote)

Foto: Ministru Komérsiu Indústria no Ambiente, Constâncio Pinto ho Vise-Ministru, Filipus Nino Perreira bainhira vizita luhan Krokodilu hafoin inaugurasaun ba Sentru Jestaun Krokodilu. Foto/Midia MKIA.