Pakistaun sei liberta no deporta feto afegaun ne'ebé uluk sai kapa hosi National Geographic

Sharbat Gula, feto afegaun ne'ebé bainhira sei ki'ik nia oin sai iha kapa revista National Geographic no hetan kaer ho dokumentu identifikasaun sira ne'ebé falsu iha Pakistaun, sei hetan liberdade no haruka fali ba nia rain, hatete hosi embaixador afegaun iha Islamabad iha loron-sesta ne'e.

"Ha'u fó sai katak Sharbat Gula livre ona hosi problema legal sira iha semana hirak ikus ne'e. Iha tempu badak, sei hetan liberdade", hakerek hosi embaixador Omar Zakhilwal iha nia pájina iha rede sosial Facebook.

Zakhilwal refere ona ba kastigu kadeia loron 15 ne'ebé maka Sharbat Gula sei kumpri antes haruka fali ba Afeganistaun.

Moshin Dawar, membru hosi ekipa legal Gula nian, hatete ona ba ajénsia notísia españól EFE katak tribunal espesial ida antikorupsaun hosi Peshawar (iha noroeste Pakistaun nian) kondena ona iha loron-sesta ne'e feto afegaun ba kastigu kadeia loron 15, hafoin Gula sai kulpadu ba akuzasaun sira hotu. REfujiada ne'e kumpri ona kastigu maioria.

Kondenada tenki selu multa ida ho folin rihun 100 rupia pakistanés nian (euro 860) no sei sai hosi Pakistaun hafoin hetan libertasaun.

Kaer Gula iha loron 26 Outubru hafoin hetan tiha dokumentu identifikasaun pakistanés sira nian ba nia ho ba oan-mane na'in rua, hafoin selu tiha funsionáriu na'in tolu. Lei pakistanés kalkula katak ba krimi ne'e tenki hetan kastigu to'o kadeia tinan 14.

Refujiada, ho tinan 40, iha oan na'in haat no moras hepatiti C, sei fila ba loron-segunda ba Afeganistaun, ne'ebé sei simu hosi xefe Estadu, Ashraf Gani, haktuir hosi Zakhiwal.

Tuir diplomata, Gula sei simu tulun hodi governu hodi hahú moris foun ida iha nia nasaun moris fatin.

Fotógrafu norte-amerikanu Steve McCurry imortaliza ona feto afegaun ne'e iha tinan 1984, bainhira nia iha tinan 12 no moris iha kampu refujiadu ida iha Peshawar. Liutiha tinan ida, fotografia iha kapa revista ne'e sai hanesan imajen ida ne'ebé koñesidu liu iha sékulu XX.

Foin lalais ne'e, Pakistaun rejista ona ema afegaun legalizadu hamutuk millaun 1,4 no ema rihun 900 resin iha situasaun legal. Komunidade refujiadu sira nian, ida ne'ebé boot liu no ne'ebé antigu liu iha mundu, hahú ona ho invazaun soviétiku iha tinan 1979.

To'o inísiu fulan ne'e, refujiadu millaun resin fila ona ba Afeganistaun tanba ultimatu hosi governu Islamabad hodi haruka sira sai hosi Pakistaun.

SAPO TL ho Lusa