POSIBILIDADE CPLP IMPLEMENTA MOBILIDADE LIVRE

Nasaun membru Comunidade de Paises dos Lingua Portuguesa (CPLP) iha posibilidade boot atu implementa polítika mobilidade livre ba ninia sidadaun sira.

Ministru Negosius Estranjeirus i Kooperasaun (MNEK), Hernani Coelho hatete katak,  pontu importante ne’ebé mak Xefi Estadu no Xefi Governu sira mós toma nota hodi sai hanesan trabalho de casa ida ba Estadu hot-hotu mak, mobilidade espasu CPLP.

Nasaun Portugal prinsipalmente hatudu disponibilidade tomak atu aranja kreativus atu implementa mobilidade ne’e, tanba mobilidade ne’e iha difikuldade oituan, tanba nasaun membrus CPLP sira ne’e iha grupu regional ida-ida ninian.

“Portugal iha bloku uniaun Europeia ninian, Timor Lesta ita iha preparasaun ba ASEAN ninian, entaun dalaruma atu halo movimentasaun ema ne’e iha difikuldades oituan. Tanba ne’e mak Portugal avansa ho proposta kreativu ida, ba kestaun mobilidade, liu husi posibilidade de fiksasaun rezidensia,”informa Hernani Coelho, ba Jornalista sira iha Aeroportu Internaionál Nicolau Lobato, Comoro Dili, Sabadu (05/11/2016) hafoin fila husi Brazil.

Nia haktuir, asuntu ne’ebe refere sei sai hanesan servisu ida ba Prezidensia rotativa CPLP Brazil ninian.

“Kestaun seluk ne’ebé mak ita persija realsa iha ne’e mak, kona-ba nova vizaun estratéjiku CPLP ninian. Iha tinan 2014 ita senti katak, iha difikuldade oit uan atu bele avansa ho aprovasaun nova vizaun estratéjika, tanba nova vizaun estratéjika CPLP ne’e, ko’alia kona-ba tinan 10 tuir mai, li-liu kona-ba saida mak presija halo atu hadia CPLP atu sai efetivu liu tan,” katak Hernani.

Entaun Hernani dehan, foin dada’uk iha Brazil ne’e mós, Timor Leste entrega nova vizaun CPLP ninian ba Brazil.

Hernani esklarese, iha pontu ida ne’e mós, Brazil simu tutan atu halo ninia Prezidensia ne’e, bele halo operasionalizasaun ba vizaun estratéjika CPLP ninian.

Hernani afirma, CPLP tradionálmente iha esu tolu ne’ebé mak fungsiona mak, esu konsentrasaun diplomátika, esu kooperasaun nomós esu konaba lingua portugeusa.

“Iha ita nia Prezidensia, Timor Leste introdus tan alarga konseitu kooperasaun ba iha kooperasaun ekonómika ba dezenvolvimentu nasaun membru CPLP sira. Entaun iha esu tolu ne’e, ita aumenta tan ida kona-ba forum ekonómia global,” informa Hernani.

Nia dehan, atividade forum ekonómia global ne’e, foin lalais Xefi Estadu no Xefi Governu sira simu hodi konsidera hanesan atividade ida ba futuru. Cos

Jornal Nacional