Sekretáriu-jeral
ONU nian, António Guterres, konsidera iha loron-kuarta ne'e katak Áfrika
hanesan "kontinente esperansa ida, promesa no ho potensial maka'as",
prefere abordajen ne'e duké haree ba rejiaun "ho baze iha problema
sira".
"Dalabarak,
mundu haree Áfrika liuhosi problema sira; bainhira ha'u haree ba Áfrika, ha'u
haree kontinente ida esperansa nian, promesa no ho potensial maka'as",
António Guterres hakerek iha deklarasaun ida ne'ebé haruka ba ajénsia Lusa.
Iha
textu, ne'ebé mosu tanba partisipasaun hosi sekretáriu-jeral nian iha simeira
Uniaun Afrikanu, iha loron 30 no 31 Janeiru, "misaun boot dahuluk nu'udar
sekretáriu-jeral", Guterres garanti ona katak senti "empeñadu hodi
hametin pontu forte sira ne'e no estabelese plataforma aas ida hosi koperasaun
entre ONU, líder sira ho povu Áfrika nian", no nia hatete katak ne'e
hanesan "importante hodi promove dezenvolvimentu inkluzivu no sustentável
no haklean koperasaun ba dame no seguransa".
Antigu
primeiru-ministru portugés hatete katak nia lori ona ba Adis Abeba
"espíritu solidariedade no respeitu maka'as", maibé mós
"sentimentu gratidaun maka'as" ba kontributu afrikanu nian ba forsa
sira dame ONU nian.
"Áfrika
fornese maioria hosi forsa sira dame ONU nian iha mundu; nasaun afrikanu sira
tama iha anfitriaun boot no jenerozu sira ba refujiadu mundial sira; iha Áfrika
iha ekonomia balun ne'ebé iha kresimentu lalais liu iha mundu", hatete
hosi antigu Komisáriu Aas hosi ONU ba refujiadu sira.
"Ha'u
husik simeira ho sentimentu konvensidu liu duké antes katak humanidade tomak
sei iha benefísiu bainhira rona, aprende no serbisu ho povu Áfrika",
Guterres hatete no hatete katak prevensaun hanesan importante hodi rezolve
konflitu sira.
"Konflitu
barak ohin loron nian hanesan internu, mosu hosi kompetisaun ba poder no
rekursu sira, dezigualdade, marjinalizasaun no divizaun sektária sira;
dalabarak, sira mosu tanba violénsia todan ka tanba ema provoka", hakerek
iha dokumentu.
"Prevensaun
sei halo liu duké ita konsentra de'it iha konflitu", nia hatete no hatutan
katak "dalan di'ak ba prevensaun no seguru ba dame ne'ebé dura maka
dezenvolvimentu inkluzivu no sustentável".
"Ha'u
laiha dúvida katak ita bele manán funu tanba dezenvolvimentu sustentável no
inkluzivu, ne'ebé hanesan mós arma di'ak sira hodi prevene konflitu sira no
terus sira, permiti atu Áfrika nabilan liután ho dalan vibrante no inspira
mundu", Guterres konklui.
SAPO
TL ho Lusa
Sem comentários:
Enviar um comentário