Viola Konstituisaun Se Lú-Olo Nu’udar Prezidente Partidu

DILI, (TATOLI) – Prezidente eleitu, Francisco Guterres Lú-Olo viola Konstituisaun Repúblika Demokrátiku Timor-Leste bainhira asume kna’ar nu’udar Prezidente ba Partidu ho Prezidente Repúblika dala ida de’it.

Primeiru Vise Prezidente Interinu Partidu Libertasaun Populár (PLP), Sabino Soares “Guntur” hatete Prezidente eleitu tenke ezerse papel funsionalismu konstituisaun RDTL nia totalmente, labele partidariza pozisaun Estadu nian.

“Ezerse funsaun Prezidente partidu FRETILIN automatikamente viola valores no normas jerais konstitusionalismu nomos viola prinsípiu povu no Estadu tanba koko no implenta dadaun ona hodi partidariza pozisaun estadu”, Sabino Soares ba TATOLI bainhira hasoru malu iha sede PLP Metiaut, segunda (15/5).

Funsaun nu’udar Prezidente Repúblika atu exerse papel funsionalismu konstituisaun RDTL nia totalmente, atu asegura funsionalismu sistema konstituisaun enjeralmente hanesan hirarkia lei vertikais no horizontal ne’ebé existe iha instituisaun Estadu nian.

Papel Prezidente mak asegura estabilidade nasionál hodi garante pás iha RDTL ne’ebé nu’udar aman ba povu, Estadu, nomos aman ba partidu polítika sira atu asegura integridade no soberania sosiál iha Nasuan ne’e.

Tanba ne’e bainhira Prezidente eleite sei ezerse funsaun Prezidente partidu FRETILIN, automatikamente viola valores no normas jerais konstituisionalismu nomos prinsípiu povu no Estadu tanba koko no implenta dadauk ona hodi partidariza pozisaun Estadu.

Alende ida ne’e dupla funsaun bele orienta ba tendensia ditadura iha tempu badak nia laran. “Poder partidu no poder Estadu persiza separa atu labele implika funsionalismu instituisaun Estadu”, Guntur fó hanoin.

Hodi hatutan funsaun partidu nu’udar instrumentu polítika, fonte informasaun, komunikasaun, edukasaun ba ema atu bele apar no akompaña prosesu sosiàl tomak iha Nasaun nomos preparasaun rekursu ùmanu hodi transfere ba Estadu bainhira manan eleisaun atu sai jestòr ba planu, progama desenvolvimentu Estadu nian tanba ne’e poder partidu no Estadu persiza separa.

Bainhira la-halo separasaun ba poder polítika ho poder Estadu sei implika Prezidente Lú-Olo nia papel Prezidente nian iha nia mandatu tomak hodi estraga kredibilidade FRETILIN nomos Estadu iha Timor-Leste.

Entertantu artigu 78 (inkompatibilidade) Prezidente Repúblika labele iha kargu polítiku seluk eh kna’ar públiku iha nivel nasionál no mós, iha kazu seluk, hala’o kna’ar privadu.

Prezidente eleitu mós antes ne’e iha konferésia Partidu FRETILIN, salaun Delta Nova, sàbadu (6/5), promete sei sai prezidente ba povu tomak, maibè relasaun ninian ho partidu FRETILIN nu’udar kestaun ida normàl. 

Jornalista: Manuel Pinto | Editora: Rita Almeida

Foto: Primeiru Vise Prezidenti Interito Partidu Libertasaun Popular (PLP) Sabino Soares “Guntur”.