CNRT Kaer Metin Prinsipiu Governasaun Parseria

DILI – Partidu Congreso Nacional Reconstrução Timorense (CNRT) kaer metin prinsipiu Governasaun parseria, wainhira lamanan absoluta iha eleisaun parlamentar.

Tuir Prezidente Konsellu Diretiva Nasional (CDN), Dionisio Babo Soares hatete katak, partidu politiku hothotu liliu CNRT iha espiritu parseria ba Governasaun uluk no sei mai, wainhira lamana absoluta.

Ida nee (prinsipiu governasaun parseria) mak maun Xanana hatudu tiha ona i kontinua nafatin ho prinsipiu ida nee,” dehan Dionisio ba jornalista sira iha studiu GMN-TV, Segunda (17/07/2017).

Dionisio haktuir, prinsipiu Governasaun parseria nee sempre iha, maibe saida mak sei akontese ba CNRT depois eleisaun remata, maibe prinsipiu parseria nee partidu hothotu iha. Dionisio salenta, se CNRT manan absoluta nee diak liu tan atu bele asegura prosesu nee tomak, bele konvida mos ema husi partidu seluk.

Iha fatin ketak, Reprezentante Programa Oficer AJAR, Inocencio Xavier hatete katak, Governasaun parseria ka Governasaun inkluzivu nee diak tanba sira hanoin ona oinsa atu hatur estadu ida nee ho partisipasaun ema hothotu nian.

Entertantu, Eis Primeira Dama Timor Leste, Isabel Ferreira hatete katak, ukun neebe mak diak mak ukun neebe hamutuk atu bele valoriza sidadaun hothotu tanba Timor ita hotu nian. Raimundo S. Fraga

Suara Timor Lorosae