Diskusaun Orsamentu Retifikativu Depende Desizaun Polítika

DILI, (TATOLI) – Diretor Nasionál Orsamentu Jerál Estadu, Ministériu Finansa (MF), Salomão Yoaquim hatete diskusaun ba orsamentu retifikativu nian depende ba desizaun polítika husi Governu Konstitusionál Dahituk (VII) no tekniku MF daudaun ne’e prepara ona estratéjia kona-ba orsamentu retifikativu nian.

Salomão esplika bainhira akontese eleisaun ida, diskusaun ba orsamentu retifikativu tenke iha tanba akontese mundansa estrutura ne’ebé afeta ba mudansa estrutura lei Orsamentu Jerál Estadu (OJE), nune’e retifika akontese iha tinan ida ne’e tanba haree ba mudansa husi VI Governu ba VII Governu Konstitusionál.

“Normalmente ita hahú retifikativu iha agostu, tempu ita bele dehan apertadu maibé tékniku sira prepara-án ona para atende ida ne’e, maibé ho adiantamentu data tomada pose membru Parlamentu Nasionál depois automátikamente ba membru Governu bele dehan preokupasaun boot ida mai iha tékniku sira Ministériu Finansa nian tanba ita hatene normalmente prepara Orsamentu Jerál Estadu sei lori entre fulan hitu to’o sia, tanba uluk ne’e ita hahú husi maiu ba preparasaun OJE to’o dezembru no ita bele hetan promulgasaun”, Salomão informa ba TATOLI bainhira hetan autorizasaun husi mídia MF nian iha Aitarak-Laran, ohin.

Ho tempu ne’ebé limitadu agora ne’e ho kalendáriu ne’ebé aumenta apertada, husi parte tékniku tenke sakrifika-án hodi buka meiu serbisu loron no kalan tenke la’o.

“Daudaun ne’e ami prepara estratéjia dadus sira ne’ebé ami prepara hela ona bainhira VII Governu forma, estratéjia ne’e ami bele aprezenta ona ba sira para tulun sira hodi foti desizaun no fó orientasaun para hala’o, maibé agora ami sei iha tempu normál para halo serbisu tanba seidauk iha orientasaun loloos hodi hein ida ne’e”.

Bainhira iha setembru nia laran iha ona tomada pose ba membru Governu, klaru katak MF sei simu orientasaun husi Governu foun para hala’o serbisu ida ne’e no sei utiliza tempu loron no kalan hodi hala’o serbisu tanba limitasaun tempu nomós preparasaun ba OJE 2018.

“Estratéjia mínimu ne’ebé ami prepara ona maka ami iha grupu rua no ida foku ba orsamentu retifikativu no ida seluk sei foku ba OJE la’o dalaida enkuantu orsamentu retifikativu remata no promulga ona entaun automátikamente grupu ida foku retifikativu ne’e sei hamutuk ho grupu Orsamentu Jerál Estadu nian”.

Salomão subliña iha dezembru ne’e seidauk bele finaliza OJE 2018 no sei bele hala’o iha janeiru ou fevereiru mak foin  hetan nia legalidade entaun bainhira prosesu to’o iha janeiru maka sei laiha despeza atu selu saláriu no kustu operasionál hodi dudu mákina Estadu ne’e la’o maibé lei orsamentu jestaun no finanseiru fó biban para bele utiliza orsamentu duodésimu husi orsamentu orijinál 2017 ne’ebé iha para bele halo finansiamentu.

“Finansiamentu duodésimu ida ne’e bele akontese fulan ida, rua maibé nia orsamentu ne’e rasik faz parte husi orsamentu despeza husi OJE 2018 nian, tanba OJE 2018 seidauk hetan aprovasaun entaun ita sei adota duodésimu depois ida ne’e aprova mak ita reajusta filafali iha sistema”.

Jornalista: Maria Auxiliadora | Editora: Rita Almeida

Foto: Diretor Nasionál Orsamentu Jerál Estadu, Ministériu Finansa (MF), Salomão Yoaquim. Foto/Egas Cristovão.