DILI,
(TATOLI) – Majór Jenerál FALINTIL-Forsa Defeza Timor-Leste (F-FDTL), Lere
Anan Timur hateten kuandu governu monu, tenke disolve Parlamentu entaun ema
bele bolu Timor Estadu falladu.
“Ha’u
la gosta rona liafuan ´Estadu Falladu´. Pudia uluk funu ne’e maka falladu para ita
integra ba nasaun seluk. Maibé, agora laiha dalan atu ba falladu. Uluk ita
hakarak sosa ho ita nia vida rasik, ita barani maibé nusa maka agora ko’alia
de’it polítika ne’e ita ba rende fali, ita tenke ba oin nafatin”, Lere hato’o
kestaun ne’e ba jornalista sira iha Palásiu Prezidente Nicolau Lobato, kuarta
ne’e, hafoin soru-mutu ho Prezidente Repúblika, Francisco Guterres Lú Olo hodi
ko’alia kona-ba situasaun polítika no militár iha rai laran.
Tuir
eis Komandante Gerileiru ne’e eleisaun antisipada sei la akontese tanba
bainhira ko’alia kona-ba eleisaun antisipada, iha nia konsekuénsia ne’ebé boot
teb-tebes maka partidu lima ne’e bele lakon kadeira no bele mós kria konflitu
entre militante sira.
“Ema
balun preokupa kona-ba eleisaun antisipada, maibé nu’udar elementu seguransa,
ha’u lakohi para akontese eleisaun antisipada. Ha’u hakarak estabilidade
nasionál. Ida ne’e maka ita preokupa. Ita nia líder sira ne’ebé maka iha
partidu sira nia oin, la’ós kualker líder maibé líder istóriku ne’ebé ho
maturidade a’as teb-tebes”, afirma.
Lere
haktuir mundu elojia Timor tanba foin lalais nia ba vizita iha Korea no Canadá,
nasaun barak hato’o parabéns ba Timor tanba maturidade hosi populasaun Timor
a’as teb-tebes, demokrasia ida ne’ebé nia nível mós a’as teb-tebes.
Kona-ba
situasaun seguransa liu-liu iha fornteira relasiona ho eis pro integrasaun sira
iha Kúpaun (Indonézia) halo demonstrasaun hasoru governu Indonézia, nia hatán,
la afeta fronteira.
“Problema
ne’e sira nian no diferente ho problema fronteira. Ita bele dehan katak
situasaun iha Timor hakmatek hela”, esklarese.
Jornalista:
Xisto Freitas | Editora: Rita Almeida
Foto:
Majór Jenerál FALINTIL-Forsa Defeza Timor-Leste (F-FDTL), Lere Anan Timur,
bainhira hakat ba iha Palásiu Prezidente Nicolau Lobato hodi hala´o soru-mutu
ho Xefe Estadu Lú Olo, ohin dadér. Imajen Palásiu PR
Sem comentários:
Enviar um comentário