Deputadu sira husu ba Governu asaun hasoru aumentu presu sira tanba situasaun polítika

Iha loron-segunda ne'e, deputadu sira hosi Partidu Libertasaun Popular (PLP) husu ona ba Governu timoroan hodi halo intervensaun urjente iha merkadu sira, tanba relatu sira kona-ba aumentu hosi folin sira tanba tensaun polítika iha nasaun.

"Ami kondena negosiante oportunista sira ne'ebé maka aproveita hela situasaun hodi aumenta presu sira hosi sasán báziku importante sira", refere hosi deputadu Abel da Silva hodi refere ba foos ho óleu, no sira seluk tan.

"Ami apela ba Ministériu Komérsiu hodi halo operasaun ida iha merkadu hodi kontrola situasaun ne'ebé la'ós pozitivu ba povu", nia hatutan.

Aumentu ba folin sira ne'e akontese iha momentu tensaun polítika iha Timor-Leste ne'ebé maka mosu tanba opozisaun la aprova programa Governu nain. Bainhira proposta rejeisaun daruak aprova iha parlamentu, Governu sei monu.

Abel da Silva esplika ona katak problema ne'e bele haree iha fatin oioin iha nasaun no husu ona atu halo fali medida sira ne'ebé halo ona iha findesemana iha vila Ainaro, ne'ebé ajente polísia sira no reprezentante sira hosi Governu halo inspesaun iha merkadu sira.

"Hanesan asaun sira pozitivu tebes no tenki repete. Maibé ha'u apela mós ba ema sira hodi halo kesar kona-ba situasaun ne'e iha polísia no iha autoridade sira", nia hatete.

Merício Juvenal dos Reis, hosi PLP, repete apelu sira ba intervensaun hosi autoridade sira iha kontrolu hosi folin sira hodi insisti katak bainhira laiha intervensaun "populasaun sira maka sai prejudikadu tebes".

"Tenki halo atuasaun tanba bainhira ne'e kontinua povu maka afetadu liu no sei iha kapasidade limitadu hodi sosa", nia hatete.

Aurélio Freitas Ribeiro, deputadu hosi Frente Revolucionária de Timor-Leste Independente (Fretilin), atribui problema ne'e ba situasaun polítika, hodi esplika katak populasaun nia tauk maka halo fornesimentu oituan ba produtu balun no tanba ne'e maka aumenta folin sira.

Abílio Sereno, responsável hosi Autoridade Inspesaun no Fiskalizasaun hosi Atividade Ekonómiku sira, Sanitáriu no Hahán (AIFAESA) hatete ba Lusa katak inspesaun hala'o ona to'o agora no la hetan alterasaun maka'as ba folin sira.

"Bainhira deputadu sira hahú ko'alia kona-ba folin sira ha'u haruka kedas brigada operasaun ida hodi halo inspesaun iha armazén sira ne'ebé maka ami iha asesu no haree liuliu ba folin foos nian. Iha fatin balun iha aumentu ida ba dolar ida ka dolar 1,5 [iha folin hosi foos 25 kilo nian]", nia hatete.

"Iha ema balun ne'ebé maka hakarak halo populasaun tauk hodi hatete katak iha aumentu dolar 10 ba presu sira maibé ne'e hanesan falsu. Ami la hetan ida. Ami kontakta ona ho autoridade munisipal sira iha mós ponta leste no súl no laiha informasaun kona-ba aumentu sira ne'e", nia afirma.

Maski nune'e, Sereno hatete fali katak autoridade sira sei iha atensaun ba asuntu ne'e.

SAPO TL ho Lusa