Kratera
hosi vulkaun Agung, iha erupsaun iha Bali, hahú nakonu ho lava "ne'ebé
karik bele hahú fakar sai ba liur", hatete hosi porta-vós hosi ajénsia ba
jestaun dezastre sira Indonézia nian iha loron-segunda ne'e.
Vulkanólogu
sira hatete ona katak prezensa hosi lava dalabarak reflete iha kalohan sinza
nian, ne'ebé asumi kór mean ida, maski iha dadeer.
Porta-vós
hosi ajénsia, Sutopo Purwo Nugroho, hatete katak bele iha erupsaun boot sira
duké sira ne'ebé maka observa to'o agora, ho baze iha informasaun sira ne'ebé
maka ajénsia jestaun ba dezastre nian simu hela hosi sentru monitorizasaun
vulkaun nian.
Nugroho
hatete katak "hahú loron-domingu maka iha erupsaun explozivu sira, ne'ebé
bele rona nia lian hosi distánsia kilómetru 12".
Tuir
porta-vós, governante sira hatán hela ho baze iha senáriu ne'ebé aat tebes,
tanba Agung iha istória ida ho erupsaun violentu sira. Erupsaun maka'as maka
akontese iha tinan 1963 no halo ema na'in 1.100 mate.
"Ami
bele iha konfiansa katak erupsaun ida ne'e sei hanesan ka la'e ho ida ne'ebé
akontese iha 1963", nia hatete.
Taka
ona aeroportu hafoin sinza sira hosi Agung to'o iha espasu aéreu. Semo atus
resin kansela tiha ona no turista hamutuk millaun resin maka afetadu.
Autoridade
sira hatete katak taka aeroportu ne'e sei dura pelumenus to'o loron-tersa
dadeer no situasaun ne'e sei hetan revizaun kada oras neen, hafoin ajénsia ba
jestaun dezastre indonéziu nian aumenta ona alerta ba nível máximu relasionadu
ho erupsaun vulkániku no haruka ona hasai populasaun tomak ne'ebé maka besik
iha kilómetru sanulu.
Bali
hanesan destinu turístiku prinsipal iha Indonézia, ho afluénsia fulan-fulan ba
turista estranjeiru rihun 200 resin, haktuir hosi informasaun ofisial sira.
Arkipélagu
Indonézia nian situa iha "Ring of Fire" hosi Pasífiku, zona ida ho
atividade sísmiku ho vulkániku maka'as ne'ebé rejista, tinan-tinan, rai-nakdoko
millaun resin, maioria hanesan moderadu.
SAPO
TL ho Lusa
Sem comentários:
Enviar um comentário