Xina hatete ba EUA hodi halakon "hanoin katak sira maka na'in ba mundu"

Iha loron-kinta ne'e, Xina husu ona ba Estadus Unidus hodi halakon "hanoin katak sira maka na'in ba mundu" no defende ona katak nunka halo polítika ida hosi "atake ekonómiku" no atu haree parseiru komersial sira hanesan "kolaborador sira no la'ós hanesan konkorente sira".

Komentáriu ne'e halo iha loron-kinta ne'e durante konferénsia imprensa ida ne'ebé halo hosi porta-vós hosi Ministériu Komérsiu Xines, Gao Feng.

Hatán ba pergunta sira hosi jornalista sira kona-ba estratéjia hosi seguransa nasional ne'ebé aprezenta iha semana ne'e hosi Prezidente Estadus Unidus, ne'ebé Donald Trump rekoñese Xina hanesan "rival poderozu", Gao Feng esplika katak Pekin "la konkorda" ho ideia ne'ebé entende relasaun komersial sira ho nasaun sira seluk hanesan "jogu ida hosi zero".

Nune'e, Gao afirma ona katak bainhira Estadus Unidus husik "mentalidade hosi Funu Malirin nian no hanoin katak sira maka hanesan na'in ba mundu", nasaun rua bele kolabora nafatin "hodi hametin dezenvolvimentu hamutuk no promove prosperidade hosi ekonomia mundial".

"Hosi kazu Estadus Unidus nian no mós hosi parseiru ekonómiku sira seluk, ami hakarak konsidera sira hanesan kolaborador sira no la'ós hanesan kompetidor sira", hatutan hosi porta-vós.

Porta-vós xinés lamenta ona katak pozisaun hosi Washington "hamosu ona preokupasaun iha mundu kona-ba instabilidade hosi ekonomia mundial iha futuru", nia afirma katak estabilidade hanesan importante hodi nune'e "mantén tendénsia hosi rekuperasaun ekonómiku".

"Ha'u hakarak destaka katak Xina iha tempu foun promove konstrusaun hosi modelu foun ida hosi relasaun internasional sira, ne'ebé kolaborasaun no benefísiu mútuo hanesan importante tebes", hatutan hosi responsável ne'e.

Porta-vós hosi Ministériu Komérsiu hosi Xina fó hanoin katak Pekin no Washington estabelese relasaun diplomátiku sira kuaze tina 40 nia laran no tanba esforsu sira hosi parte rua maka hetan ona konkista boot sira.

Nia fó ezemplu ba aumentu hosi komérsiu bilateral - ne'ebé pasa hosi dolar millaun 2.500 (euro millaun 2.100) tinan 1979 ba dolar millaun 524.300 (euro millaun 441.580) iha tinan 2016 nia rohan.

Iha fulan 11 dahuluk tinan ne'e, troka komersial sira entre Xina ho Estadus Unidus aumenta ona ba dolar millaun 527.220, hatudu aumentu ida hosi 12,8% relasionadu ho períudu hanesan iha tinan liubá.

Ministériu Defeza Xina nian reaje mós ba estratéjia hosi Donald Trump, ne'ebé ezajera no hasai hosi kontestu esforsu xinés sira nian hodi moderniza nia defeza nasional, haktuir hosi komunikadu ida ne'ebé fó sai iha loron-kuarta kalan iha nia "site".

"Ezérsitu Xina nian kompromete nafatin hodi hametin interkámbiu no koperasaun ho sira nia homólogu hosi nasaun sira seluk, no hodi aumenta tan responsabilidade sira iha nível internasional tuir sira nia kapasidade", afirma hosi porta-vós hosi Ministériu Defeza, Ren Guoqiang, ne'ebé haktuir iha komunikadu ne'e.

Aleinde ne'e, subliña ona katak Xina nunka buka dezenvolvimentu hodi estraga interese hosi ema sira seluk nian maibé garanti katak sei la hadook mós sira nia direitu no interese rasik.

Nune'e, nia lamenta ona, halo aluzaun ba Estadus Unidus, katak "iha nasaun balun ne'ebé tau sira nia interese uluk duké sira seluk no liuhosi interese komun hosi komunidade internasional nian, hodi uza konseitu antigu hosi "jogu hosi zero" hodi fó dezignasaun ba nasaun sira seluk no sai hanesan egoísta".

SAPO TL ho Lusa