Otél Balun Seidauk Tuir Padraun

DILI, (TATOLI) – Ministériu Turizmu hamutuk ho Autoridade Inspesaun no Fiskalizasaun Atividade Ekonómika no Sanitária (AIFAESA) no Ministériu Komérsiu no Indústria hala’o inspesaun ba otél sira ne’ebé iha ona naran (branch) hanesan otél Timor Plaza, Novo Turismo no otél balun iha Dili atu haree katak otél sira ne’e tuir duni ona padraun no estandariza  tuir klasifikasaun otél nian, maibé balun seidauk tuir padraun.

Ministru Turizmu, Manuel Vong, hatete vizita ida ne’e haree liuliu kona-ba serve (services) otél nian hahú kedan husi odamatan otél nian (front office), housekeeping ka serbisu limpeza nian, hahán no hemun (food and beverage) no liuliu antendimentu ba kliente sira.

“Tanba ema hirak la’o viajen to’o mai tenke bá fatin ida ne’ebé deskansa mak otél. Nia deskansa hotu tenke buka han no hemu buat ruma, se nia toba nia fatin presiza atu iha troka, mudansa buat sira ne’e hotu, serve sira ne’e sai hanesan padraun ida ne’ebé ita presiza kumpri”, katak Vong iha otél Novo Turismo, ohin.

Enkuantu iha fatin balun hanesan Airport Hotel ne’ebé lokaliza iha Raikotu, ministru lamenta tanba fatin ne’e iha okos fa’an ai, klaran fa’an services balun ne’ebé mak latuir duni padraun.

“Ha’u-nia apresiasaun boot ba Novo Turismo ne’ebé mak sai hanesan referénsia, Timor Plaza mós maibé atu dehan loloos ita presiza iha standar ida hodi bele regula otél hotu mak iha Timor-Leste. Tanba ita hakarak atu fa’an ita-nia marka ida di’ak, liuliu Timor-Leste hanesan destinu turístiku ho kualidade, úniku iha rejiaun Ázia Pasífika tanba ita úniku”.

Tanba ne’e poténsia boot atu dezenvolve turizmu, liuliu nasaun viziña Bali, Indonézia ho situasaun jeográfika liuliu vulkaun halo ema barak loos hakarak atu mai Timór no Governu ida ne’e fó apoiu tomak ba investidór nasionál sira para bele sai na’in duni ba rai ida ne’e.

“Liuliu ita hakarak osan atu sirkula duni iha rai ida ne’e, se ita kria kondisaun ida di’ak, ha’u fiar katak ita sei sai duni destinu ida úniku no kompetitivu tanba ita-nia kualidade serbisu”.

Diretór Operasionál, AIFAESA, hatete papél AIFAESA observa direta ba otelaria nian liuliu ba lisensiamentu, nune’e AIFAESA husu ba ministériu relevante bainhira fó lisensa halo uluk  lai vistoria.

Tanba haree ba lisensa ne’ebé fó husi instituisaun kompetente, liuhusi observasaun direta nota katak otél balun ne’ebé iha lisensa ne’e nia prátika latuir duni nia lisensiamentu.

Jornalista: Maria Auxiliadora | Editora: Rita Almeida

Imajen: Otél Novo Turismo Dili, Foto/Google.