Pe. Guilermino Louva Servisu PNTL

DILI — Selebrasaun misa Santu Natal iha sidade Dili, espesialmente Parokia Bekora, lao iha ambiente paz no hakmatek. Tan nee merese atu louva servisu PNTL nian.

“Hau hakarak fo parabens no Boas Festa ba PNTL tomak, liu liu ba Komisariu Komandante Jeral PNTL, Julio Hornay neebe organiza ona membru PNTL sira, nune selebrasaun Natal lao hakmatek ho ita boot nia regra no ita boot sira nia seguransa  iha sosiedade liu liu iha Dili,” dehan Amo Parokia Igreja Becora, Pe. Guilermino da Silva liu husi nia omilia iha selebrasaun misa Natal, Parakia Becora.

Amu Parokia nee hatoo mos parabens ba estadu neebe tinan ida nee iha dezenvolvimentu ba regra sira, kompara ho tinan hirak liu ba, PNTL sira vijilansia ona iha nia servisu.

Nia relata Natal hanesan lia neebe ema hotu hein kleur husi tempu ba tempu. Natal neebe Emanuel moris iha bibi luhan hodi fo garantia ba sarani sira atu keta tauk, maibe haboot nafatin esperansa, hakmatek nafatin ho fiar katak Maromak sempre horik ho sarani sira.

Iha biban nee Amo Parako husu sarani sira atu aproveita momentu Natal nian hodi reflete ida-idak nia situasaun pesoal, familia, sosiedade no nasaun Timor Leste. Tanba nee ema hotu presiza iha esperansa no hakmatek, ema hotu presiza ho kalma atu hatene ema ida idak nia situasaun em partikular no situasaun em jeral, nune bele hatene Maromak nia hakarak saida ba sarani sira ho situasaun neebe iha.

Amu parokia fo hanoin tan katak, tinan 2017 neebe besik remata ona bele sai hanesan tinan neebe fo lisaun no hanorin ema hotu sai matenek no lao iha situasaun ida nee nia laran.

“Ita keta sai hanesan ema uluk basaa ohin loron ita tama ona iha mundu modernu, mundu siensia no mundu matenek nian, tanba nee natal ida nee tenke hanorin ita iha mundu matenek atu hatene hakmatek, rona no haboot esperansa iha moris, keta tauk atu hasoru nakukun kalan nian neebe hafalun ita, nakukun mundu nian bele halo ita nakdoko, maibe ita fiar la lakon esperansa, tanba nee natal ema tenke hakmatek nunee Natal iha nia signifikadu, tan nee mai ita hotu ho ain kman hodi hakat ba Betlehem simu Jesus neebe mai iha ita leet hodi hananu Gloria In Excelsis Deo, amen,”dehan Amo Parokia nee.

Iha fatin hanesan komunidade Becora, Esmeralda Dias dehan nia sente hakmatek no seguru liu tuir misa Natal tinan nee tanba hetan seguransa masimu husi membru PNTL.

“Hau no hau nia familia sente hakmatek tuir misa natal iha tinan ida nee, tanba iha misa kalan nee PNTL fo seguransa masimu, nunee bele selebra natal ho hakmatek. Hau hakarak fo hau nia natal kmanek ba timor oan hotu neebe komemora loron Natal iha tinan ida nee,”dehan Esmeralda.

Entretantu Helio Guterres hanesan komunidade louva servisu PNTL nia servisu iha teritoriu laran tomak. “Parabens ba PNTL sira tanba ho servisu makaas neebe sira fo, povu tomak bele selebra natal tinan nee ho hakmatek. Hau nia  deseju natal kmanek ba sarani sira neebe selebra natal tinan ida nee,”dehan Helio. 

Maria Lay | Suara Timor Lorosae