DILI, (TATOLI) – Prokuradór
Jerál Repúblika (PJR), José da Costa Ximenes, hateten durante janeiru-fevereiru
tinan ne’e, purvolta kazu hamutuk 2800 itál maka pendente iha Ministériu
Públiku tanba limitasaun prokuradór sira.
“Entre kazu hamutuk 2800 itál
ne’e, Dili maka maioria (okupa 2000 itál prosesu koresponde ho prosesu
prokuradór na’in 14), Baukau ho 290 itál prosesu no Suai 300 itál prosesu”,
Ximenes hato’o ba jornalista sira iha Palásiu Prezidente Nicolau Lobato, Bairru
Pité, segunda ne’e hafoin relata kazu refere ba Prezidente Repúblika, Francisco
Guterres Lú Olo.
Nia haklaken iha nivel hotu-hotu
hosi kazu hirak ne’e, aas liu maka Ofensas ba Integridade, tuir mai Violénsia
Doméstika (segundu lugár).
“Prezidente Repúblika preokupa
teb-tebes la’ós ba Kriminalidade Organizada de’it maibé krime sira ne’ebé ho
karáter hanesan Violénsia Doméstika no Krime Seksuál”, haktuir Prokuradór
Jerál.
José Ximenes hatutan Prokuradoria
Jerál sei hato’o informasaun anuál ba Komisaun Permanente Parlamentu Nasionál
nu’udar dalan ida atu responde ba difikuldade sira nomós oportunidade ne’ebé
durante ne’e Ministériu Públiku hasoru.
Aleinde ne’e, nia relata mós ba
Prezidente Repúblika kona-ba iha tinan kotuk Ministériu Públiku Timor-Leste
hanesan uma na’in ba enkontru Prokuradór Jerál CPLP iha Dili, hosi 25 to’o 27
outubru 2017.
Agora daudaun prepara hela
pelumenus livru ida ne’ebé ko’alia kona-ba atividade Ministériu Públiku ninian,
hahú hosi intervensaun Prokuradór Jerál CPLP ninian to’o iha tema sentrál,
sub-tema rua inklui konferénsia ne’ebé halo, hatama mós deklarasaun Dili, akta
Dili nomós alterasaun ba Memorandu Entendementu ne’ebé asina iha Luanda.
Jornalista: Xisto Freitas | Editora:
Rita Almeida
Imajen: Prokuradór Jerál
Repúblika (PJR), José da Costa Ximenes.
Sem comentários:
Enviar um comentário