KAK Sensibiliza Matéria Anti Korrupsaun Ba Dirijente MT

DILI, (TATOLI) – Komisaun Anti Korrupsaun (KAK) sensibiliza matéria Anti Korrupsaun ba dirijente Ministériu Turizmu (MT) nian hodi hakle’an sira-nia koñesimentu hodi bele fasilita serbisu loroloron nomós asegura desizaun sira ne’ebé foti ligadu ho knaar diária tanba hola parte iha síklu desizaun hodi nune’e bele atinje meta programa ne’ebé ministériu tau tuir planu estratéjiku no  ajuda atu hanoin buat ne’ebé loos no ko’alia buat ne’ebé realidade nomós halo desizaun ba buat ne’ebé fó benefísiu ba komunidade.

Inspetór Gabinete Inspesaun no Auditoria Interna, MT, Celio Gonzaga Sarmento, hatete programa ida ne’e hola parte iha atividade ki’ikoan ida ba implementasaun programa reforma administrativa ne’ebé sai programa importante iha Sétimu Governu nian.

“Iha prosesu reforma adminstrativa iha administrasaun públika presiza komesa husi hadi’a hanoin, hakle’an koñesimentu direjente sira iha área relevante nune’e fó impaktu ne’ebé di’ak ba rezultadu serbisu loroloron”, Celio hatete iha Sentru Konvensaun Dili, ohin, iha ámbitu sensibilizasaun nian.

Atividade ida ne’e fó prioridade liubá nivel dirijente tanba sira mak hola parte iha síklu desizaun MT nian, nune’e espera desizaun hirak ne’ebé prodús loroloron bele fó benefísiu di’ak no kualidade.

Diretór Jerál Prevensaun Komisaun Anti Korrupsaun (KAK), Rosário de Araújo, hatete atividade ida ne’e oinsá atu kapasita dirijente sira kona-ba matéria anti korrupsaun liuliu liga ba korrupsaun, subornu nune’e bele hatene no sai hanesan matadalan ba ministériu atu informa ba funsionáriusira atu komprende lei sira.

“Se la’e ema dehan KAK ne’e sai impedimentu ba buat hotu-hotu, afinál la’e tanba ne’e ho enkontru hanesan ne’e bele esplika di’ak liután hodi dirijente sira bele hatene”.

Sensibilizasaun ida ne’e hanesan formasaun regulár ne’ebé tama iha planu KAK nian atu fó treinamentu ba funsionáriu sira oinsá mak halo prevensaun ba korrupsaun, no iha koñesimentu sobre matéria prevensaun nian.

Ministru Turizmu, Manuel Vong, dehan mákina burokrasia administrasaun públika sentralizadu iha direjente sira, nune’e sensibilizasaun ida ne’e tanba mós durante ne’e sira serbisu iha presaun nia okos no barak mak laiha korrajen atu hola desizaun tanba ligadu ho kestaun sira-nia kompeténsia maski parte ida sira iha, maibé iha parte seluk lei mós lafó dalan atubele halo.

“Iha situasaun ida ne’e entre realidade ho buat ne’ebé eskrita iha lei dalabarak ladún iha sinerjis tanba ita-nia asesór sira ne’e barak mak halo tiha lei, sira laiha background iha área turizmu nian entaun hamosu situasaun ida ne’ebé difisil ba ita-nia dirijente sira atu foti desizaun.

Ezemplu mak serbisu ne’ebé ligadu ho prestasaun serbisu ba iha otél no restaurante sira, tuir loloos MT mós iha kbiit atu taka otél balun ne’ebé halo knaar lalooos hodi loke fali fatin ne’ebé lori ema bá iha prátika prostituisaun, maibé ida ne’e la’ós kompeténsia ministériu nian enkuantu MT fó lisensa para atu opera otél no restaurante ne’e.

“Seluk kestaun administrativa ki’ikoan, ezemplu halo reuniaun presiza suratahan tende ser liu aprovizionamentu, tanba ne’e hakarak tebes atu enkoraja sira halo reforma institusionál ba lei sira ne’ebé lafavorese. Sira hotu tenke iha korajen atu iha konxiénsia atu hala’o serbisu ne’e sein iha implikasaun ba sira-nai aan rasik, maibé ba interese públiku KAK presiza fó sensibilizasaun ba sira bainhira hola medida bazea ba lei ne’ebé iha.

Jornalista: Maria Auxiliadora | Editora: Rita Almeida

Imajen: Dirijente MT partisipa iha sensibilizasaun matéria anti korrupsaun ne'ebé aprezenta husi KAK. Foto/MT.