Reabilitasaun Eskuadra Comoro Hein Governu Foun

DILI - Eskuadra Polisia Comoro infrenta situasaun neebe grave, tanba wainhira udan monu rai, bee sempre nalihun hodi tama ba sala laran, situasaun nee halo sira labele halao sira nia knar la ho diak.

Atu responde ba situasaun nee, maka Komandu PNTL iha ona planu, no dezenhu ba eskuadra foun nee, maibe tenke hein governu foun hodi bele rhabilita eskuadra neebe dignu ba pesoal Polisia neebe halao sira nia misaun estadu iha fatin nee.

Segundu Komandante Jeral, Polisia Nasional Timor Leste (PNTL), Komisariu Faustino da Costa hatete, kondisaun eskuadra Comoro klaru ke grave duni, tanba tempu udan bee sempre tama, maibe kuandu situasaun politika normal, no Orsementu Estadu iha maka PNTL sei rehabilita.

“Maibe situasaun politika hanesan nee orsamentu jeral mos laiha ita uja deit dua desimo depois oinsa para ita atu hadia eskuadra nee sai diak,” hatete nia depois remata enkontru iha Kuartel Jeral, PNTL, Caicoli-Dili (10/04/2018)

Maske nunee, espera katak governu foun mai, no sei metin nunee Orsamentu Jeral do Estadu iha para PNTL bele hadia eskuadra nee.

Enkuantu oras nee bele dehan diak oituan tanba tama ona ba iha tempu neebe atu bailoro, no udan ladun ona, la hanesan semana ka fulan balun liu ba neebe situasaun nee prejudika tebes sira nia servisu. 

Luciana Ximenes

Suara Timor Lorosae