DESKONFIA TAMA GRUPU COLIMAU 2000 HODI OHO MEMBRU PSHT

Arguidu nain nen ho inisial BP, AC, MS, BX, DoM no DM tenki ba hatan iha tribunal, tanba deskonfia tama iha grupu Colimau 2000 hodi oho membru grupu PSHT ho inisial BS ne’ebe matebian tiha ona.

Tuir akuzasaun husi ministeriu publiku ne’ebe lee sai husi juiz prezide katak iha loron 12 fulan agostu tinan 2006 grupu arte marsiais PSHT no Colimau komesa mosu problema wainhira membru grupu PSHT Rosario Maudasi no Constâncio oho vitima Pedro Maumeta nudar membru Colimau 2000 iha Munisipiu Ermera.

Iha loron 2 fulan Novembru 2006 grupu arte marsiais ne’ebe lidera husi arguidu Armindo de Jesus no Andre Martins hamutuk ho arguidu sira seluk ba oho vitima José Faria.

Iha loron 2 fulan Novembru 2006 mais ou menus tuku 10:00 dader, arguidu MS hamutuk ho vitima José Faria nia maun rasik hanesan membru Colimau 2000 hamutuk ho arguidu sira seluk hanesan BP, AC, BX, DoM no DM halo retaliasaun hodi oho vitima BS nudar membru PSHT iha semiteriu Sisrudu suku Estado Munisipiu Ermera.

Arguidu MS lori katana tá iha vitima BS nia kakorok monu ba rai no arguidu BP tá iha vitima nia kotuk no arguidu sira seluk lori fatuk tuda ba vitima nia ulun no isin lolon rezulta vitima mate iha fatin.

Enkuantu vitima mate ona, arguidu AM no AJ hamutuk ho joven nain lima foti vitima nia isin lolon ba tau iha nia bin Pascoela nia uma ne’ebe besik vitima Miralda Soares.

Iha loron 2 fulan Novembru tinan 2006 lokraik arguidu sira hanesan familia vitima hanesan membru PSHT sunu uma barak inklui oho tan vitima Miranda Soares tau iha ninia uma laran hodi sunu motuk vitima iha ninia uma laran.

Husi arguidu nia hahalok halo ema nain rua mak lakon vida ou mate. Tanba ne’e ministeriu públiku akuza arguidu nain neen hanesan autor ba pratika krime homesidiu agravadu ne’ebe previstu iha artigu 139 husi kodigu penal TL.

Julgamentu ba kazu ne’e rasik labele kontinua tanba parte advogadu husi arguidu nain neen husu ba tribunal atu konsulta aktus no orienta ninia kliente molok presta deklarasaun.

Ho razaun ne’e tribunal adia fali julgamentu ba loron 11 fulan Julhu tinan ne’e hodi rona deklarasaun arguidu sira nian.

Audensia julgamentu prezide husi juiz kolektivu Duarte Tilman, Sribuana da Costa, Zulmira Auxiliadora, ministeriu publiku reprezenta husi prokurador Bartolomeo de Araújo no arguidu hetan asistensia legal husi advogadu privadu Adelina Nahak. Ita

GMN TV | Grupo Média Nacional