Brigadeiru Falur lansa livru “O Voo do Pombo” ho matabeen

DÍLI, (TATOLI) - Brigadeiru Jenerál Domingos Raul “Falur Rate Laek” lansa livru “o voo do pombo” ka Falur Nia Semo, ho matabeen tanba konsidera katak durante tempu ba libertasaun, família liuliu espoza komprende no pasiénsia tebes kona-ba saida mak nia hala’o.

Iha Fundasaun Falur Rate Laek, segunda ne’e, iha Mandarin, Díli. Bainhira lansa livru Falur Nia Semo (versaun tetun no portugés), liuhosi diskursu, Brigadeiru Jenerál Domingos Raul “Falur Rate Laek” hateten katak lansamentu ne’e nu’udar aktu ne’ebé materializa nia relasaun ho Timor-Leste.

“Materializasaun husi ideia ida, ha’u-nia kontribuisaun hodi mantein memória moris kona-ba faktu pasada ne’ebé mak importante ba ita-nia povu; inísiu husi asaun ne’ebé mak ha’u apoiu ba dezenvolvimentu juventude no Timor-Leste,” dehan eskritór livru o voo do pombo”, Falur Rate Laek.

“No fundo, razaun tomak no motivasaun ne’ebé mak akompaña durante ha’u-nia vida tomak; ita-nia povu, ita-nia país, ninia liberdade, independénsia no dezenvolvimentu,”  Falur Rate Laek fó razaun.

Xefe Estadu Maiór Armada Portugal, António Silva Ribeiro, dehan livru “O voo do pombo” importante mós ba konstrusaun estadu Timor-Leste nian.

“Livru ida ne’e konstitui importante ineditu kontributu istóriku no polítiku ba komprensaun kona-ba konstrusaun estadu Timor-Leste iha finál sékulu 20,” dehan Xefe Estadu Maiór, António Silva Ribeiro, iha nia diskursu.

Xefe Estadu Maiór ne’e akresenta mós katak livru ne’e nu’udar testemuñu primeiru, memória Falur Rate Laek; obra ne’ebé relevante no indispensavel ba istória resente Timor-Leste nian, atu nune’e istória Timor-Leste bele fó koñese ba mundu.

“Nu’udar obra ne’ebé rezulta ona, la’ós de’it esperiénsia autór nian, maibé reflesaun kle’an estratéjika kona-ba vizaun futuru ne’ebé pragmátika liu país ida nian embora jeografikamente ki’ik; aprezenta ona istória grande (boot) respeitu no vitória, hahú kedas luta ba independénsia,” refere Xefe Estadu Maiór Portugés, António Silva Ribeiro.

Autoridade militár portugés ne’e hateten tan katak Livru ne’e mós valorizadu liu, hodi sai nu’udar leitura fasil, maibé iha tempu hanesan asertiva no kontein pensamentu polítiku estratéjiku luan kona-ba realidade Timor-Leste.

“Obra ida ne’e justifika plenamente ba dezenvolvimentu ne’ebé mak la’o daudaun hahú independénsia Timor-Leste. Tanba ida ne’e konstitui traballu referénsia ba leitór sira oioin hanesan akadémiku, estudante, polítiku no jornalista sira,” akresenta Xefe Estadu Maiór Armada Portugal, António Silva Ribeiro.

Entretantu, partisipa iha lansamentu livru ne’e akadémiku, Sekretáriu Estadu Arte no Kultura, Teofilio Caldas, Ministra Edukasaun no Juventude, Dulce de Jesus Soares, korpu diplomátiku, veteranu, sosiedade sivíl nó mós autoridade importante seluk tan.

Iha biban hanesan, alende lansamentu livru, halo mós lansamentu ba Fundasaun Falur Rate Laek ho tiru ahi artifisiál, nu’udar sinál abertura ofisiál.

Jornalista: Rafy Belo | Editór: Manuel Pinto

Imajen: Lansamentu Livru no Fundasaun Rate Laek. Foto: Egas Cristovão.