DILI, (TATOLI) - Prezidente
Parlamentu Nasionál (PPN), Arão Noé husu atu eis-membru Parlamentu Nasionál
(PN) IV lejizlatura atu entrega karreta ho matríkula MP ba PN, bainhira la
entrega mak sei prosesu tuir dalan justisa no haruka polisia foti asaun.
“Prosesu la’o ona no ami hein
de’it, karta daruak ba tiha ona mós seidauk entrega no karta da-toluk sei ba
tan, se sira la entrega mak iha dalan rua ne’ebé sei aplika mak lori sira
liuhosi prosesu judisiál no haruka polisia hodi foti asaun.”
“Karreta ne’e la’ós sira
nia ona, se sira dehan ninian enkuantu sira sosa ona, maibé la’ós tan troka
naran mak sira privatiza ona,” Prezidente Parlamentu, Arão Noe ba jornalista
sira, iha Parlamentu, ohin.
Lider másimu órgaun lejizlativa
ne’e kontinua husu ba eis-deputadu sira ne’ebé seidauk entrega Karreta
karik bele fó fila ona, tanba Konsellu Administrasaun Parlamentár deside
ona katak tenke lori fila Karreta hirak ne’e hodi fó fali ba deputadu
lejizlatura da-lima.
“Ida ne’e desizaun finál iha
fulan kotuk, karta haruka ona ba eis-deputadu sira ne’ebé seidauk entrega
Karreta atu lori hikas mai hodi deputadu sira atuál bele uza,” nia
reforsa.
Hodi konta Konsellu
Administrasaun Parlamentár iha kinta lejizlatura la halo desizaun foun, maibé
aprova de’it saida mak kuarta lejizlatura aprova ona, nu’udar kontinuasaun ida
hosi terseira lejizlatura nian.
“Se mak sente prejudikadu ba
desizaun ne’e, bele lori ba tribunál depois órgaun judisiál deside, se mak
sala. se parlamentu mak sala entaun Karreta ne’e hela ho imi, maibé imi
mak sala tenke kumpre desizaun tribunál nian.
Jornalista: Zezito Silva | Editór:
Manuel Pinto
Sem comentários:
Enviar um comentário