MKOTT Halibur Asinatura Rihun Hodi Solidariza Bernard Collaery-Witness K

DILI, (TATOLI) - Movimentu Kontra Okupasaun Tasi Timor (MKOTT) halibur asinatura mensajen solidariedade rihun ba rihun hodi haruka liuhusi embaixada Austrália iha Díli, atu solidariza advogadu Bernard Collaery no Witness K.

Advogadu na’in rua ne’e, hetan julgamentu husi Tribunál Austrália relasiona ho kazu espionajen ba Timor-Leste (TL) husi Austrália ba delimitasaun fronteira marítima.

Ativista no komisaun organizadora ida husi MKOTT, Faustino Soares hateten, MKOTT konsidera akuzasaun ida ne’e la justu no kontra direitu manu, viola liberdade espresaun no kontra prinsípiu solidariedade iha mundu.

“Ne’e mak MKOTT organiza, halibur ita-nia mensajen solidariedade ida ne’e atu solidariza ita-nia kolega na’in rua; hanesan aktu agradesimentu ida ne’ebé povu Timor-Leste fó ba ita-nia kolega na’in rua ne’ebé hetan julgamentu iha tribunál,” informa membru ativu MKOTT, Faustino Soares ba Ajénsia TATOLI, iha jardin Liceu, ohin.

Faustino akresenta katak aktu halibur asinatura mensajen solidariedade rihun ba rihun ida ne’e hatudu katak solidariedade husi povu Timor-Leste ba povu Austrália ne’ebé defende lia loos ne’e nunka mate. Katak, ne’e solidariedade rohan laek ida nunka hotu.

“Ida ne’e mak povu Timor-Leste halo solidariedade ba povu Austrália ne’ebé mak defende lia loos, luta ba direitu umanu iha mundu, nune’e mós entre nasaun Timor-Leste ho Austrália,” nia fó razaun.

Ativista no komisaun organizadora ida husi MKOTT, Faustino soares informa mós katak ohin MKOTT rekolla mensajen solidariedade ida ne’e, hahú husi dia 12 to’o 14, nune’e dia 17 setembru 2018, sei haruka mensajen ida ne’e ba governu Austrália, liuhusi sira-nia embaixadór.

“Tanba ne’e, hakarak nafatin apela ba públiku, ba diresaun hotu hanesan veteran, povu tomak, ba joventude Loriku Aswa’in sira, ba estudante nomós ativista direitu umanu hotu iha Timor-Leste, ne’ebé mak mai husi internasionál iha hotu Timor-Leste bele uza ita-nia minutu ida hodi fó ita-nia mensajen solidariedade ne’e liuhusi asinatura ne’ebé MKOTT prepara iha fatin ida ne’e,” portavóz Faustino Soares.

Iha fatin hanesan, Isabel Mendonça, nu’udar sidadaun ida, hateten katak nu’udar sidadaun Timor-Leste ita tenke iha solidariedade ba ita-nia sidadaun australianu na’in rua ne’ebé defende lia loos kona-ba kazu Timor-Leste nian.

“Ha’u orgullu ho ita-nia maluk ne’ebé mak defende lia loos maske sira husi nasaun seluk. Katak, buat ne’ebé la justu sira defende atu halo justu. Ne’e duni ha’u nu’udar sidadaun Timor-Leste, ha’u hakarak hato’o ha’u-nia solidariedade rohan laek ba maluk ne’ebé defende ona, halo buat ne’ebé la justu sai justu,” nia dehan.

Nia mós husu ba órgaun soberanu Timor-Leste hanesan Parlamentu Nasionál no governu atu bele hamutuk ho MKOTT sujere ba Austrália labele julga sidadaun ne’ebé defende lia loos.

“Husu Parlamentu ho governu hamutuk ho MKOTT sujere fali ba governu Austrália atu labele julga ita-nia maluk na’in rua tanba sira ne’e defende lia loos no justisa, atu halo justu,” asinante Isabel Mendonça sujere.

Tuir observasaun Ajénsia TATOLI, iha fatin asinatura ne’e, públiku entuziasmu ba asina mensajen solidariedade ne’e hodi solidariza advogadu Bernard Collaery no Witness K.

Jornalista: Rafy Belo | Editór: Manuel Pinto

Imajen: Públiku atus ba atus entuziasmu ba asina mensajen solidariedade solidariza advogadu Bernard Collaery no Witness K, iha posku konsentrasaun MKOTT, jardin Liceu. Foto FB: Ryo Loriku Lialuli