Projetu Kategoria Emerjénsia Loloos Prevee Antes

DILI, (TATOLI) – Analista hosi Core Group Transparency Timor-Leste (CGT-TL), Juvinal Diaz, hateten projetu sira ne’ebé kategoriza nu’udar emerjénsia ne’e loloos bele prevee hela antes, ka loloos labele konsidera nu’udar kategoria “necessidades urgentes e imprevistas” hanesan deskreve iha artigu 37 hosi Lei Orsamentu no Jestaun Finanseiru.

Tuir nia bainhira Governu labele kontrola ona nia despeza sira ne’e tuir regra loloos ba kategoria sira ne’ebé iha, Timor-Leste sei lakon valór osan barak tan, tanba gasta osan lahó avaliasaun sira ne’ebé transparente no kontável.

“Dalan ida ne’ebé prudente liu ba parlamentu atu halo molok aprova osan ba selu projetu sira ne’e maka tenke halo verifikasaun ba projetu sira ne’e hodi hatene merese ka la’e projetu ne’ebé implementa ona ne’e tama kategoria necessidades urgentes e imprevistas, nune’e ita bele salva povu nia osan ka uza osan povu nian atu fó benefísiu duni ba povu sira duké benefisia ema elite no kompañia na’in sira de’it,” dehan Juvinal liuhusi ninia pontu devista ne’ebé Ajénsia Tatoli asesu iha nia kna’ar fatin, Fatumeta, sesta ne’e.

Nia hatutan avaliasaun ida ne’ebé kle’an ba projetu sira ne’e sei asegura kualidade despeza sira, espesialmente iha tinan oin mai kuandu Governu prepara hela atu aloka tan maizumenus millaun $278.3 hodi ba selu projetu “naun orsamentál” sira ne’e, ne’ebé sei halo orsamentu 2019 iha sa’e ba iha nivel biliaun $1.772.9 no posível bele liu tan.

“Preambulu Lei Fundu Petrolíferu hatuur hela prinsípiu fundamentál ida katak presiza iha planeamentu ne’ebé efisiente no presiza ezekusaun orsamentu Estadu ida ne’ebé loloos nu’udar parte ida hosi boa governasaun ba riku soin petrolíferu”, subliña.

Hanesan deskreve antes, projetu emerjénsia hamutuk 142 ne’ebé Governu ajudika ba kompañia sira iha tinan sira liu-ba, ho valór orsamentu $87.229.633 no iha proposta Orsamentu Jerál Estadu (OJE) 2018 ne’e Governu aloka milliaun $19.079 no milliaun balun tan atu gasta iha tinan sira oin mai, maske nune’e, iha milliaun balun maka gasta ona iha tinan sira pasadu.

Jornalista: Xisto Freitas | Editora: Rita Almeida

Imajen: Analista hosi Core Group Transparency (CGT), Juvinal Diaz