Prezidente Prezidente-Repúblika
timoroan hatete iha loron-kinta ne'e katak desidi promulga Orsamentu Jeral
Estadu nian (OJE) ba tinan 2018 tanba konsidera katak importante hodi selu
divida empreza sira nian no ativa fali ekonomia, no aponta mós
"dezafiu" ba konta publika sira.
Iha mensajen ida ba nasaun,
Francisco Guterres Lu-Olo hatete katak valor orsamentu ne'e barak liu, no husu
atu husik "pratika ba gastu sira arbiru" no kestiona kapasidade ba
ezekusaun mákina Estadu nian ne'ebé maka falta too final tinan ne'e nian.
"Ha'u foin promulga Lei
Orsamentu Jeral Estadu nian ba tinan 2018, tuir kompeténsia ne'ebé maka fó mai
ha'u hosi (...) Konstituisaun", hatete loron-kinta ne'e iha Palásiu
Prezidensial.
"Hosi analiza, ha'u konklui
katak laiha fundamentu ruma atu halo pedidu fiskalizasaun preventiva
konstitusionalidade no legalidade. Orsamentu Jeral Estadu nian ba tinan 2018
ne'e ho selu divida sira empreza nian hodi kria kampu serbisu atu hasa’e
ekonómia iha rai-laran, iha nível interinu", afirma.
Iha mensajen, xefe Estadu esplika
katak promulgasaun ne'e permite "fasilita estadu tama iha ezekusaun
orsamentál normál hodi kumpre obrigasaun prioritária sira, liu-liu ba grupu
sidadaun vulnerável sira", no mós selu tusan ba ospitál iha rai-li’ur no
mina ba jeradór sira.
Apezarde desizaun ne'e, Lu-Olo
esplika dezafiu sira ne’ebé hasoru ho promulgasaun OJE, inklui mós kapasidade
ezekusaun ne’ebé ki’ik - falta de'it trimestre ida ba final ba tinan fiskal
nian - alokasaun "orsamentu ne’ebé barak liu ba setor infraestrutura no
ladun tau osan ba edukasaun no saúde".
"Ita kontinua hatudu hatudu
katak alokasaun orsamentu makaas ba projetu Tasi Mane, maski seidauk hatene
loloos saida mak sei akontese ho Greater Sunrise", hatete no refere ba
projetu dezenvolvimentu kosta súl nian ba setor mina no gás.
Lu-Olo konsidera katak OJE ne'e
"ass tebes" no ne'ebé maka obriga transferénsia adisional ne'ebé ass
hosi Fundu Petroliferu nian.
"Karik ezekusaun durante
fulan tolu ikus liu tinan ida ne’e nian, hanesan ho taxa ezekusaun orsamentál,
iha rejime duodesimál, iha fulan ualu nian laran, maka montante global OJE ba
tinan 2018 tuir loloos dolares biliaun 1.1 de'it", hatete.
"Ita presiza hatoman-an hodi
gasta ho kuidadu. No husik tiha prátika sira ne’ebé ita halo horihuluk, iha
tinan hira liubá. Fundu Minarai ne’e ita-nia fundu soberanu mesak ida de’it,
nune’e ita tenke asegura katak benefísiu la’ ós de’it ba jerasaun ohin ninian
maibé tenke hato’ o mós ba jerasaun sira sei tuir mai. No asegura nafatin
kapasidade finanseiru Estadu nian wainhira enfrenta dezafiu oioin iha
futuru", afirma.
Tanba motivu hirak ne'e, xefe
Estadu husu ba Governu "hatudu rigor iha ezekusaun despeza públika, liuliu
iha tempu ezekusaun ida ne’ebé badak tebes" no atu previzaun sira
makroekonómiku nian halo ho di’ak no lolós tuir realidade no liga ho mudansa
iha estrutura ekonomia, no "lalika mai ho númeru oioin atu justifika de’it
Orsamentu ida ke bo’ot", ho ezekusaun ne'ebé difisil.
"Karik orsamentu ne'e
destina ba selu tusan sira ne'ebé maka la selu tanba limitasaun orsamental, iha
periodu duodesimal, ha'u hein katak iha futuru ita labele monu tan iha tusan
sira hanesan ne’e tamba ita la selu iha ninia tempu rasik", hatete tan.
Lu-Olo mós refere katak elementu
ida ba OJE ne'ebé maka iha debate makas liu maka, konjuntu projetu sira besik
140 ne'ebé aprovadu iha loron ikus sira governasaun VI Governu nian, iha tinan
2017.
"Tamba Parlamentu Nasionál
hatán ona atu harii Komisaun Inkéritu Parlamentar hodi fiskaliza projetu sira
antes atu selu, ha’u apela atu harii lalais Komisaun ida ne’e, atu nune’e
prosesamentu pagamentu hotu bele tuir dalan ne’ebé loos, ho transparénsia no
rigor", hatete.
Defende mós katak parlamentu bele
konsidera "oinsá hadi’ak kestaun normativa sira ka regulamentar sira hodi
artikula di’ak liután dispozisaun sira hosi Lei Fundu Minarai no Lei Orsamentu
no Jestaun Finanseiru, inklui fó fila fali osan sira ne’ebé kobra liu tiha ona.
Hanoin ba futuru - ne'ebé maka
Governu prepara ona OJE ba tinan 2019 - Prezidente husu atu orsamentu sira ba
tinan sira oin mai tenke buka halo ekilíbriu di’ak liután, katak alokasaun osan
justu liu entre dezenvolvimentu umanu no dezenvolvimentu fíziku no gradualmente
despeza labele bo’ot liu reseitas sira".
Atu investimentu sira hotu tenki
bazeia ba "kritériu retornu sosiál no ekonómiku ida aas babeibeik",
atu OJE sira ba tinan sira oinmai, tenke bazeia "ba prinsípiu
sustentabilidade Estadu nian no sosiedade rasik", katak persentajem
finansiamentu bo’ot liu hahú mai husi reseitas la’ ós-minarai, ne’ebé aumenta
babeibeik, husi ekonomia diversifikadu no reforma.
"Ita tenke hatene prepara,
ezekuta no fiskaliza, jere di’ak liután Orsamentu Jeral Estadu nian nu’udar
instrumentu finanseiru ida ke bele finansia kresimentu ekonómiku no
dezenvolvimentu sosiál. Importante mós atu hanoin katak ida ne’e prosesu ida ke
presija ezijénsia no persisténsia husi tinan ida ba tinan seluk, husi fulan ida
ba fulan seluk, husi loron ida ba loron seluk", afirma.
SAPO TL ho Lusa
Sem comentários:
Enviar um comentário