TR seidauk taka prosesu hasoru Emília Pires

Tribunal Rekursu (TR), seidauk taka prosesu kazu Eis Ministra Finansas Emília Pires, maske arguida ses-an husi Justisa no halai ba estranjeiru.

Kuaze tinan tolu resin ona , Eis Ministra Finansas arguida Emilia Pires, halai sai husi Timor-Leste no ba hela iha estranjeiru, maibé Tribunal Rekursu seidauk taka prosesu justisa ba kazu ne’ebé arguida komete.

Prezidente Tribunal Rekursu, Deolindo dos Santos, hateten, kazu Emília Pires nian la’os deit krime ne’ebé arguida komete maibé Tribunal indijita mós kazu sivíl balun ho grau ne’ebé boot.

Tanba ne’e, Tribunal sei hasai desizaun ba kazu ne’e iha tempu badak. “Ha’u hatete ona iha juis nain lima sei finaliza buat sira ne’e sei mais rapidu posibel, montantu iha buat balun ne’be mak sai tiha ona hau labele temi, desizaun balun sai tiha ona i agora dadauk tribunal tenta indizita buat balun tan i la’os deit kazu krimi iha mos kazu sivil balun ne’ebe bo’ot depois tibunal tenta para finaliza tiha iha tempu badak nia laran”, klarifika, Deolindo dos Santos, hafoin enkontru ho Xefe Estadu Francisco Guterres Lú Olo, Sesta (23/11/18), iha Palásiu  Prezidensial Nicolau Lobato, Bairo Pite-Díli.

Entretantu, Eis ministra finansas Emilia Pires komete kazu krime administrasaun da noza ne’ebé akuza husi ministériu públiku, maibé iha desizaun primeira instánsia Tribunal Distrital Díli absolve tiha krime administrasaun da noza. No kondena fali arguida ho kazu krime partisipasaun ekonómika no negósiu relasiona ho projestu sosa kama ba hospital Nasionál  no referál sira iha mandatu Governasaun Aliansa Maioria Parlamentar-AMP.

Prezidente Tribunal Rekursu, Deolindo dos Santos, relata mos kona-ba kazu sira ne’ebé pendente hamutuk liu 3000 no prosesu sivil liu 1000 iha primeira instansia. Iha kazu segunda instansia hamutuk 210 ne’ebé pendente iha Tribunál Rekursu.

Prezidente Tribunál Rekursu, Deolindo dos Santos, informa mós kona-ba ezekusaun orsamentu ne’ebé atinji ona 94 %. Iha enkontru dahuluk Deolindo dos Santos informa tiha ona Planu Orsamentu Tribunál Rekursu ba Prezidente Repúblika. Ba tinan 2019, Tribunál Rekursu sei hadi’ak liutan kondisaun iha area Tribunál ninian.

Tribunál Rekursu hala’o hela inspesaun ba juiz ne’ebé sei remata iha inísiu tinan oin. Hafoin inspesaun liu husi desizaun Konsellu sei halo promosaun horizontál atu sa’e ba primeira no segunda klase. Prezidente Tribunál Rekursu mós informa servisu Kámara Kontas nian ba Prezidente Repúblika. Eus

GMN TV | Grupo Média Nacional