Aprovasaun lei antikorupsaun no
revizaun lei pensaun vitalisia sai nu'udar prioridade Governu timoroan nian iha
área reforma lejislativa, tuir kunjuntu rezolusaun ida ne'ebé maka aprovada
hosi ezekutivu.
Rezolusaun sira, ne'ebé aprovada
iha Konsellu Ministru, ne'ebé abranje reforma sira lejislativa no judisiaria,
politika sentral rua atual no anterior governu timoroan sira nian.
Kestaun ne'e tama iha ajenda
semana ne'e nian ba reuniaun Konsellu Ministru ne'ebé maka debate nota
konsetuais sira dahuluk konabá triu reforma sira nian no, finalmente, aprova
rezolusaun sira ne'ebé aprezenta hosi ministru Reforma Lejislativa no Asuntu
Parlamentar sira, Fidelis Magalhães.
Entre metas prioridade reforma
sira nian iha mós aprovasaun ba Lei Organizasaun Judisiaria nian ida ho kriasaun
mekanismu konsiliasaun nian ho arbitrejen ba rezolusaun konflitu sira, ne'ebé
maka sei implementa too final tinan 2020 nian.
Objetivu esensial maka reduz
numeru prosesu pendente sira iha tribunal distrital sira - rihun resin, iha
sivil no mós kriminal.
Tuir nota ezekutivu ida, hafoin
prazu ida "tinan tolu too hat", reforma judisiaria pasa ba kriasaun
"sesaun espesializada sira iha tribunal distrital sira, iha área barak,
inklui mós direitu komersial no kontratu sira".
Iha komponente lejislativa,
"prioridade imiediata Governu nian maka aprovasaun hosi Parlamentu
Nasional ba lei antikorupsaun, revizaun lei pensaun vitalisia nian no
aprovasaun no publikasaun ba kódigu konduta ida ba membru sira" ezekutivu
nian.
Governu sei fó prioridade mós
"ba aumentu kualidade lei sira nian", no promove "regra komum
foun sira ne'ebé maka ministru hotu-hotu tenki tuir iha redasaun lei no dekretu
sira nian".
"Objetivu reform judisiaria
no lejislativa sira nian maka garante ba sidadaun sira, iha nasaun ne'e, asesu
ba Justisa no ba koñesimentu ba lei sira, inklui mós tradusaun lei balun ba
tetum", refere ezekutivu ne'e.
"Iha tinan hat oinmai sei
lansa kampaña sosializasaun sira konabá direitu sidadaun sira nian no asesu
sidadaun sira nian ba sistema Justisa nian, iha teritoriu nasional laran
tomak", nia esplika.
Iha tempu badak nian laran sei
too ba iha Konsellu Ministru, terseira rezolusaun ida, konabá inovasaun
administrativa, dokumentu "transversal no integradu" ida, hanesan
saida maka ministru Fidelis Magalhães esplika ba Lusa.
"Ami hakarak promove
inovasaun administrativa no liga area reforma tolu ne'e, iha kontestu klean
hodi mantein interligasaun entre prosesu ne'e, ho forma hodi moderniza
Estadu", adianta governante ne'e.
SAPO TL ho Lusa
Sem comentários:
Enviar um comentário