PM Taur : “Ema Hotu Atu Preparadu Simu Dezafiu Foun Iha Tinan 2019 Nian”

DILI (TATOLI) - Primeiru-Ministru Taur Matan Ruak, husu ba ema hotu atu preparadu simu dezafiu foun iha tinan 2019 nian, maibé Xefe Governu fó esperansa katak sei halo esforsu hotu hodi bele hakat liu dezafiu sira ne’ebé sei mai.

Xefe Governu hato’o asuntu ne’e, bainhira sai nu’udar inspetór serimónia iha hasa’e Bandeira Nasionál ba semana dahuluk fulan Janeiru 2019 nian, iha Resintu Palásiu Governu, Segunda-feira ohin.

“Ohin ita iha tinan 2019, dezafiu balu ke ita liu iha 2018, mas iha dezafiu balu ke ita tranzita mai 2019, no hein tan hirak ne’ebé sei akontese iha 2019, i ita hotu-hotu preparadu para enfrenta, simu, hasoru, jere no hakat liu.” dehan Xefe Governu iha nia intervensaun.

Xefe governu ne’e kontinua esplika dezafiu ida ke hotu-hotu hatene mak VIII Governu Konstitusionál sei falta nia membru 12 mak seidauk toma posse, sanulu resin rua ne’e Ministru na’in sia mak seidauk toma pose, ita espera katak 2019, kondisaun hotu bele reúne para ita hakat liu dezafiu ida ne’e.”

Hanesan Primeiru-Ministru, kontinua esforsu para hakat liu dezafiu ida ne’e. Dezafiu ida seluk oinsá OJE 2019 bainhira Prezidente Repúblika promulga, ita (Governu) bele hetan kbiit liu para implementa Orsamentu ne’e.

Eis Prezidente repúblika ne’e hatutan iha 2018, Governu Konstitusionál da-ualu halo esforsu boot hodi hakat liu dezafiu lubuk ida, hanesan prepara lori Programa no Orsamentu Jerál Estadu rua, 2018 no 2019 nian ba Parlamentu Nasionál hodi hetan aprovasaun no lori ba Xefe Estadu halo promulgasaun.

Tanba ne’e, Nia (Taur Matan Ruak) hein katak iha 2019, karik buat hotu la’o di’ak, Governu iha predisaun katak Kresimentu ekonomia bele rekupera ba to’o 4.9%, hafoin iha tinan 2017-2018, nasaun kuaze paralizadu hodi halo ekonomia nasionál tama iha resesaun.

“Ita boot sira hatene, iha tinan 2017-2018, ita-nia nasaun kuaze paralizadu iha resesaun nia laran, ekonomia la la’o, tanba osan la sirkula. Tinan ida ne’e, ita-nia predisaun, karik buat hotu la’o di’ak, Kresimentu ekonomia nasaun nian bele rekupera ba to’o 4.9%, tarjetu ne’ebé ita hein ne’e akontese.”

Bainhira atinje ona tarjetu osan bele sírkula, emprezáriu sira selu nia funsionáriu sira, nivel ekonomia negósiu iha rai laran bele la’o, entaun ne’e dezafiu boot ida ba ita hotu, liuliu ita boot sira ne’ebé lida ba ezekusaun orsamentu tempu ba tempu.

Nune’e mós iha tinan 2019 ne’e, Governu presiza hadi’a planeamentu nune’e bele define prioridade ida di’ak ba nasaun tomak, presiza aloka rekursu ne’ebé di’ak, no mós oinsá atu halo reforma di’ak ba estadu, liuliu iha administrasaun públika, para bele fó kbiit liután ba funsionáriu públiku sira hodi serbisu di’ak liután Estadu.

Ikus liu lori Primeiru Ministru Taur Matan Ruak, agradese ba servidór Estadu sira ne’ebé kontribui ona serbisu iha tinan 2018 nian hodi kontribui ba susesu, no husu atu kontinua iha tinan ida ne’e ho fiar malu, dixiplina, to’o sedu serbisu fatin, tanba Governu Konstitusionál da-ualu hakarak presta serbisu ne’ebé di’ak ba nia sidadaun sira.

Ekipa kobertura

Imajen: Primeiru Ministru Taur Matan Ruak sai nu’udar inspetór serimónia iha hasa’e Bandeira Nasionál ba semana dahuluk fulan Janeiru 2019 nian, iha Resintu Palásiu Governu, Segunda-feira (07/01) ohin. FOTO GPM