Governu aprova polítika nasionál rua ba bee-moos

DILI, 19 agostu 2020 (TATOLI) -- Governu liuhusi reuniaun Konsellu Ministru (KM) aprova projetu rezolusaun Governu rua, ne’ebé aprezenta hosi Ministru Obra Públika, Salvador Soares dos Reis Pires, relasiona ho polítika nasionál ba jestaun rekursu ídriku no abastesimentu bee-moos.

“Polítika nasionál ba jestaun rekursu ídriku define kona-ba responsabilidade, intensaun, objetivu no estratejia Governu nian ligadu ho jestaun hosi rekursu ídriku nian,” relata Ministru Prezidénsia Konsellu Ministru, Fidelis Manuel Leite Magalhães, hafoin ramata reuniaun ezekutivu iha Palásiu Governu, kuarta ne’e.

Tuir governante ne’e, dokumentu ne’e fornese kuadru jerál no liña asaun ba polítika nasionál hosi jestaun rekursus ídrikus nian to’o tinan 2030.

Dokumentu ne’e nu’udar dokumentu orientasaun no informasaun ida ba autoridade públika, jestór rekursu ídriku no entidade hotu ne’ebé envolve iha elaborasun no implementasaun ba lejizlasaun, regulamentasaun, polítika, estratejia, planu no asaun sira ba rekursu ídriku Repúblika Demokrátika Timor-Leste nian (RDTL).

Enkuantu polítika nasionál ba abastesimentu bee-moos ho objetivu atu estabelese vizaun no objetivu hosi Governu relasiona ho kompromisu nasionál no internasionál hirak ne’ebé asume, no iha tempu hanesan sei foka ba fornesimentu liuhosi asesu ekitativu ba serbisu bee-moos ne’ebé adekuadu, seguru no sustentável liuhosi aplikasaun kustu ne’ebé asesível ba sidadaun tomak.

Dokumentu refere halibur prinsípiu orientadora sira ne’ebé permite atu tradús vizaun kona-ba asesu universál ba abastesimentu públiku bee-moos nakfilak ba estratéjia no planu sira, no ninia implementasaun di’ak liu hodi benefisia populasaun Timor-Leste no dezenvolvimentu sosiál no ekonómiku ne’ebé sustentável iha rai-laran.

Jornalista: Antónia Gusmão | Editora: Julia Chatarina