Timor Post (28/08/2020) -- Eis
Prezidente Parlamentu Nasionál, Arão Noé de Jesus, hatete Komisaun Anti
Korrupsaun (KAK) ho Ministériu Públiku (MP) tenke serbisu hamutuk hodi prosesa
kazu korrupsaun, maiske Lei Medida Prevensaun Kombate Korrupsaun (LMPKP) Prezidente
Repúblika (PR), Francisco Guterres “Lú-Olo” promulga ona iha loron 24 Agostu
2020.
Tuir Arão katak KAK ninia
natureza serbisu hanesan polisia investigasaun kriminál iha area korrupsaun
de’it, maibé na’in ba asaun penal mak Ministériu Públiku. Tanba nee parte rua
tenke serbisu hamutuk.
“Ha’u hakarak hatete katak, KAK
nee polisia investigasaun kriminál iha area korrupsaun de’it, mais nia nee
la’ós Ministériu Públiku. Tanba tuir ita nia konstituisaun katak knar nee
Ministériu Públiku nian, atu prosesa ka lae, so Ministériu Públiku autoriza.
Tanba ne’e mak tenke iha serbisu di’ak entre KAK ho Ministériu Públiku, para
prosesu sira ne’e la’o,” Arão adianta ba jornalista sira iha PN, kuarta
(26/08).
Arão hatete, bainhira lei ida
tama ona iha em vigor tenke aplika, tanba nee nia parte hein katak órgaun
judisiál sira ne’ebé iha ona, bele haree didi’ak lei nee para atu bele
implementa.
Arau hato’o parabéns tanba depois
PN aprova tiha Prezidente Repúblika promulga ona, bele sai ona hanesan baze
legal ba ita.
Eis Prezidente PN haktuir lei ida
ne’e prosesu kedan iha tinan 2010, depois kaduka dala rua no iha kinta
legislature mak foin finaliza. Eis Membru Komisaun A-PN ne’e dehan lei nee
rasik iha estudu barak kona-ba oinsá halo prevensaun sira, inklui loke tan area
kriminalizasaun balu.
Nia konsidera ho lei ne’ebé maka
promulga, kritika sira ne’ebé mak uluk sempre dirije dehan KAK la iha nehan atu
kontra korrupsaun, iha ona baze legal mais seguru para halo prevensaun no
kriminalizasaun ba kazu korrupsaun.
Entretantu 24 Agostu 2020
Prezidente Repúblika, Francisco Guterres Lú-Olo, promulga Lei Medida Prevensaun
no Kombate Korrupsaun, ne’ebé Parlamentu Nasionál aprova iha 20 Jullu 2020 ho
votu unanimidade 61.
Jornalista: Julio Salinas Soares
Sem comentários:
Enviar um comentário