Tama-Sai Ilegal, Lori Corona Mai TL

DILI, STLNEWS co -- Primeiru Ministru Taur Matan Ruak hanesan mos Ministru Interior, preokupa ho sidadaun neebe tama sai ilegal hodi sae sintu iha Indonezia, tanba lori moras Corona virus (COVID-19) mai Timor Leste.

Xefe Governu hatutan, membru Persaudaran Setia Hati (PSHT) lao ilegal ida nee lori preokupasaun ba Ministeriu Interior, tanba nee sira haree oinsa bele halo prevensaun ba ema neebe kontinua tama sai ilegal.

“Iha fator tolu mak importante los kontribui ba pasajen ilegal iha fronteiras makaas, ida mak relasaun familiar entre populasaun sira neebe iha fronteiras, ida seluk problema tranzasaun komersiu sira ba sosa sasan iha neebe baratu, entaun sira tamak, sai seluk mak Marsial liu liu ikus nee ita boot sira haree, ita nia oan sira husi PSHT ba mai ilegalmente ida nee lori preokupasaun boot ba Ministeriu Interior, ”dehan PM TMR, bainhira halo enkontruu ho Prezidente Republika, iha Palasiu Prezidente Lobite, Bairru semanal, Dili, Kinta (17/09/2020).

Nia esplika oras nee governu haree hela oinsa atu reforsa seguransa iha fronteiras sem halo kontaktu ho lideransa PSHT.

“Hau fo ona instrusaun ba Vise Ministru Interior, kontaktu sira para koopera tanba risku nee boot, ita nia labarik sira ba ilegalmente lori moras mai ba sira nia familia no oho sira nia familia, bele oho tan komunidade bainhira daet,” katak PM Taur.

Taur afirma maski moras nee iha mundu numeru aumenta, maibe Timor Leste graça adeus laiha problema. Tanba nee mak sidadaun hotu tenke kontribui atu hadook aan nafatin husi moras nee atu nunee labele prejudika sidadaun sira.

Eis aman nasaun nee mos apela ba joven sira ou sidadaun hotu, atu bele kontribui ba seguransa sidadaun sira nian, tanba moras nee laos buka ema ida neebe deit, maibe moras nee mai la hili.

“Ami mos koalia ho munisipiu sira liu liu munisipiu sira neebe mak iha fronteiras sira hanesan, Bobonaro no Covalima para reativa fali Konsellu Seguransa municipal nia, hodi fo kontribuisaun hodi tau matan ba ita nia nia fronteiras sira,” katak eis nia ba nasee aman.

Taur dehan, agora dadaun sira halo investigasaun makaas kona ba ema neebe mak fasilita sidadaun neebe tama ilegal, buka hatene para detekta iha faktu ruma kalae, sei hatudu ema fo kontribuisaun mak sei toma medidas.

Nunee mos kona ba issu neebe mak hatete katak, Amerika la fo osan mai Timor, Xefe Governu dehan, nia seidauk simu surat kona ba asuntu ida nee.

Reportajen: Emerenciana Pinto | Editora: Carme Ximenes

Imajen: Primeiru Ministru (PM) Taur Matan Ruak. (Foto: Media PR)