Asosiasaun Hak dean, operasaun Kok hamosu violasaun direitus humanus

Dili - Director Exekutivu Asosiasaun HAK, Manuel Monteiro hatete, tuir infor­masaun neebe sira rekoilha katak, operasaun Komando Operasaun Konjunta (PNTL no F-FDTL) hodi hasoru grupu Mauk Moruk, Conselho Revolusionariu Maubere (CRM) iha Baucau, hamosu violasaun direitus humanus ba komunidade nebe laiha sala.  Komunidade laiha sala mos, membru KOK baku.

Deklarasaun nee hatoo hosi Manuel Monteiro bainhira hasoru iha ninia servisu fatin, Farol Dili, Kinta (9/4). “Operasaun military ka polisia, hot-hotu tenke respeita direitus humanus. Agora ita haree operasaun KOK, viola ona direitus humanus iha parte oioin. Membru KOK balu sai fali hanesan juis lolos. Sira sai hanesan penyidik utama hodi tulun juis sira iha investigasaun. Laos sira ba halo fali julgamentu iha terenu,” hatete Manule Monteiro.

Iha Konstitusaun da Republika, Artigu 34 bersiklu 1 hatete, akuzadu hot-hotu sei nudar inosente nafatin too juis hakotu lia katak, ema nee sala duni maka bele hatene katak nia sala duni. Maibe kuandu juis seidauk hasai desizaun katak, ema ida nee sala, laiha razaun ba se deit atu duun ema nee kriminozu ka lae.

“Agora ita haree iha operasaun nee, tanba deit atu hetan informasaun, ita kaer ema nebe la sala, ita halo torturasaun (hanesan baku ema too ran sai). Balu tenke halo tratamentu too iha HNGV Dili. Nee labele. Nee viola ona direitus humanus tanba kaer fali ema nebe la sala. Ami iha keisa hamutuk 35. Komunidade maka hatoo keisa ba ami tanba dehan, sira hetan baku no laiha sala,” hatete Manuel.

Hosi Uma Fukun PN, Dili, membru Komisaun B-PN,  Cessar Valente de Jesus hatete, tuir nia haree, dala barak violasaun direitus humanus mosu iha operasaun. PN simu keisa barak, simu telephone barak hosi komunidade.

Sira dehan, “Operasaun ida nee, komunidade neebe sala laiha, simu todan. Hetan baku hosi membru KOK. Ami husu Komando KOK labele haruka membru sira baku ema arbiru. Ema neebe sala laiha, labele baku,” katak Cesar Valente.

Diretor FONGTIL, Arsenio Pereira mos informa. Operasaun KOK nee, komunidade barak sai vitima maske sira la involve grupu Mauk Moruk. “Komunidade balu halo viagen mos, membru KOK baku no tesi ema nia fuk nebe naruk nee. Hau hanoin, ida nee lalos. Lolos nee atu buka Mauk Moruk. Buka los mak Mauk Moruk. Ema neebe la hatene buat ida, mak sai fali vitima”. Thomas Sanches

Suara Timor Lorosae