LEO: “PROBLEMA DESPORTU, KOALIA PROGRAMA LAOS OSAN”

DILI - Sekretariu Estadu Juventude e Desportu (SEJD), Leovigildo da Costa Hornai  husu ba desportistas defisinetes atu halo programa, laos koalia ba osan. Tanba problema osan ne’e bele diskute hodi rezolve. Leo hato’o kestaun ne’e relasiona ho torneiu inklusivu  ne’ebe  realiza husi Assosiasaun Defisiente Timor-Leste (ADTL) iha kampo SEJD maske eventu ne’e halao ho susesu, maibe  defisiente sira sempre hasoru  obstaklu  oin-oin tanba faktor osan.

“Agora ami ho governu tomak hare’e hela oinsa mak bele diskuti defisiente nia problema. Ne’e dunik hau husu ba defisiente sira atu la bele koalia ho osan  maibe importante mak programa. Hau mos agradese no orgulhu ba familia defisiente sira, tanba ho imi nia suporta defisiente sira bele partisipa iha torneiu ne’e,” hatete Leo iha nia diskursu iha kampo SEJD, avenida Direitos Humanos Dili, Sabdu (16/05) .

Leo mos husu ba defisiente sira atu eventu tuir mai la bele hanoin atu partisipa deit, maibe tenki iha koordenasaun atu nune’e bele konvida mos governu no identidade sira hotu, hodi direitamente asisti no hare’e defikuldade saida mak iha, ne’e dunik lori governu nia naran nia mos la haluha hato’o obrigao wain ba Governu Australia, ne’ebe alende fo suporta inklui mos oferese matenek ne’ebe sira iha ba defisiente Timor-Leste.

“Hau fo parabens ba ekipa ne’ebe sai manan nain iha torneiu ida ne’e i la haluha mos husu ba ekipa ne’ebe la konsege manan atu kontinua treinu para depois bele hatudu prestasaun diak  hodi bele sai manan nain iha eventu tuir mai,” tenik Leo. Iha fatin hanesan defisiente ne’ebe sai hanesan segundu lugar iha eventu kadeira roda rua husi organizasaun Centru Liman Hamutuk Kopera, Magno de Jesus Soares,  senti kontenti tanba bele hetan segundu lugar iha eventu kadeira roda rua, i  eventu ida ne’e bele fo mos motivasaun ba sira, liu-liu ema defisiente. Nia  hatete eventu refere laos naran halao deit, maibe nia objektivu atu komemora loron aniversariu Restaurasaun 20 de Maio ba dala-13.

Magno imforma, to agora difikuldade ne’ebe sira sei infrenta mak ekipamentus/kadeira roda. Tanba kadeira roda ne’ebe agora sira iha atu a’at ona, tanba kadeira ne’e kleur ona. Ne’e dunik nia husu karik bele Governu mos loke matan netik ba sira hodi nune’e bele halao sira nia atividade iha vida moris defisiente nian. Entretantu manan nain ba bisikleta roda tolu ne’ebe sai primeiru lugar ho naran, Evaresto simu osan ho montante $400.00, segundu lugar ho naran Francisco do Amaral simu osan $ 300.00, terseiru lugar ho naran Jose do Rego Castro simu osan $200.00, kuartu lugar ho naran Jose Soares simu osan $100.00.

Entretanu kategoria  mane ba kadeira roda rua primeiru lugar ho naran, Julio Soares simu osan $ 400.00,  segundu lugar ho naran Vera simu osan $300.00, terseiru lugar ho naran Jito Mendes simu osan $200.00, kuartu lugar ho naran Bernadino Bareira simu osan $100.00. Kategoria feto kadeira roda rua primeiru lugar ho naran Welen simu osan $ 250.00, segundu lugar  ho naran Ofilia simu osan $ 200.00, terseiru lugar ho naran Olinda Amaral simu osan $150.00 no kuaatu lugar ho naran Maria Pereira simu osan $100.00. Eventu basketbol inklusivu primeiru lugar husi grupu TLMTL simu taxa ida ho osan $ 500.00, segundu lugar husi grupu CNA simu taxa ida ho osan $350.00, terseiru lugar husi grupu ADTL simu taxa ida ho osan $ 250.00, kuaatu lugar husi grupu HERA simu osan $100.00. (BT)

Business Timor – Abílio